Eldegi zeınetaqynyń ortasha mólsheri qandaı
ASTANA. KAZINFORM – Jyl basynan beri respýblıkalyq bıýdjetten 1 trln 44,3 mlrd teńgege zeınetaqy tólendi, onyń ishinde bazalyq zeınetaqy tóleýge – 337,6 mlrd teńge, yntymaqty zeınetaqy tóleýge – 706,7 mlrd teńge jumsaldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
2025 jylǵy 1 sáýirdegi jaǵdaı boıynsha zeınetkerler sany — 2 mln 465 myń adam.
— 2025 jylǵy 1 sáýirdegi jaǵdaı boıynsha jıyntyq zeınetaqynyń ortasha mólsheri 143 622 teńge, onyń ishinde yntymaqty zeınetaqy mólsheri — 95 963 teńge, bazalyq zeınetaqy — 47 659 teńge boldy, — delingen habarlamada.
Budan buryn habarlanǵandaı, 2025 jylǵy 1 qańtarda bazalyq zeınetaqy tóleminiń mólsheri Ulttyq bank aıqyndaıtyn ınflıatsııanyń boljamdy deńgeıine sáıkes 6,5%-ǵa, yntymaqty zeınetaqy 8,5%-ǵa, ıaǵnı ınflıatsııa deńgeıinen 2% — ǵa oza otyryp ulǵaıtyldy.
Budan basqa Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqyny eń tómen kúnkóris deńgeıiniń 70%-na deıin, eń joǵary — 120%-ǵa deıin jyl saıyn kezeń-kezeńimen arttyrý júzege asyrylady.
— 2025 jylǵy 1 qańtardan bastap bazalyq zeınetaqynyń eń tómen mólsheri eń tómen kúnkóris deńgeıiniń 65%-nan 70%-ǵa deıin ulǵaıtyldy, bul 32 360 teńge, onyń eń joǵary mólsheri eń tómen kúnkóris deńgeıinen 105-ten 110%-ǵa deıin arttyrylyp, 50 851 teńge boldy, — delingen habarlamada.
2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq múlde joq bolsa, bazalyq zeınetaqy eń tómengi kúnkóris deńgeıiniń 70%-na teń bolsa, sodan keıin 10 jyldan asqan ár jyl úshin onyń mólsheri 2%-ǵa artady. Al eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 90%-y bolady. Eńbek ótili 30 jyl nemese odan kóp bolsa, kúnkóris deńgeıiniń eń joǵarǵy mólsherinde ıaǵnı 110% belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aı.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
Azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.
Aıta ketelik QQS boıynsha zeınetaqy men járdemaqy ındeksteledi.