Elde jumyrtqa, sary maı, et, sút arzandady

ASTANA. KAZINFORM — Saýda jáne ıntegratsııa mınıstrliginde múddeli memlekettik organdar jáne ákimdiktermen birlesip áleýmettik mańyzy bar azyq-túlik taýarlarynyń baǵasy jáne baǵanyń ósimin tejeý boıynsha qabyldanyp jatqan sharalar talqylandy.

Ulttyq statıstıka bıýrosynyń aqparaty boıynsha, 2025 jyldyń 22-29 sáýir aralyǵynda ÁMAT baǵasynyń ındeksi 0,3% — ǵa ósti, al bir apta buryn ósim 0,4%. Esepti aptada ónimniń jekelegen túrlerine baǵanyń tómendeýi tirkeldi: jumyrtqa 0,5%, súzbe 0,2%, sary maı, sıyr eti, taýyq eti, sút 0,1% arzandady.

Un, nan, makaron ónimderi jáne kúrish baǵasy turaqty.

Jıynda sıyr etiniń baǵasy jeke talqylandy. Baǵanyń ósý qarqynyn bir aptada 0,3% — dan 0,1% — ǵa deıin tómendetý sharalary aıtyldy. Atap aıtar bolsaq iri qara maldy elden shyǵarýǵa engizilgen úsh aılyq tyıym men deldalsyz aýyl sharýashylyǵy jármeńkelerin kúndelikti ótkizý jumystary pysyqtaldy.

Azyq-túlik naryǵyndaǵy jaǵdaıdy odan ári turaqtandyrý maqsatynda shekaradaǵy baqylaýdy kúsheıtý, aýyl sharýashylyǵy ónimderin ruqsatsyz áketýge jol bermeý, sondaı-aq óńirlerdegi jármeńkeler jelisin keńeıtý máseleleri de talqylandy.

— Saýda alańdarynyń sanyn ulǵaıtý, olardy jyljymaly veterınarııalyq zerthanalardy qosa alǵanda, qajetti ınfraqurylymmen qamtamasyz etý jáne deldaldardyń qatysýynsyz jergilikti taýar óndirýshilerdi belsendi tartý boıynsha usynystar qaraldy. Keńeste osyndaı jármeńkeler sheńberinde halyq úshin ónimniń baǵalyq qoljetimdiligin qamtamasyz etý máselelerine erekshe nazar aýdaryldy, — delingen habarlamada.

Ákimdikterdiń ótinimderi sheńberinde ishki naryqty tolyqtyrý úshin ımporttyq kókónisterdi jetkizý múmkindikteri qosymsha talqylandy. Osy maqsat úshin jedeldetip resimdeý jáne osyndaı júkterdiń ótýi úshin «jasyl dálizdiń» jumys isteýi qamtamasyz etiletin bolady. 

Aıta ketelik elde qandaı azyq-túlik pen qyzmet túriniń baǵasy ózgergeni týraly jazǵan edik.