Elde jemqorlyqqa qarsy reformalardyń oryndalý barysy saraptaldy
ASTANA. KAZINFORM — Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń kezekti otyrysynda Jemqorlyqqa qarsy memleketter tobynyń (GRECO) usynymdaryn júzege asyrý barysy qaraldy. Bul týraly Aqorda málim etti.
Jıynda Memlekettik qyzmet isteri agenttigi jáne Ádilet mınıstrligi basshylyǵynyń baıandamalary tyńdaldy.
Memlekettik keńesshi Erlan Qarın sybaılas jemqorlyqqa qarsy is-qımyldy jetildirý baǵytynda qabyldanyp jatqan sharalardyń mańyzyna toqtalyp, eldegi progressıvti ózgeristerge nazar aýdardy.
— Sybaılas jemqorlyqqa qarsy is-qımyl máseleleri jónindegi komıssııanyń búgingi otyrysy tarıhı oqıǵadan keıin uıymdastyrylyp otyr. 15 naýryzda ótken jalpyhalyqtyq referendýmda el azamattarynyń basym daýysymen jańa Konstıtýtsııa qabyldandy. Jańa Ata zań «memleket adam úshin» modeline kóshýdi bekitken mańyzdy qadam boldy. Osylaısha, adamnyń quqyqtary, bostandyqtary men múddeleri memlekettik saıasattyń negizgi basymdyǵyna aınaldy. Jańa Konstıtýtsııada saıası qurylym, ekonomıka, áleýmettik saıasat sekildi basqa da salalar men baǵyttardy keńinen qamtıtyn mańyzdy jańashyldyqtar kóp. Sybaılas jemqorlyqqa qarsy kúres saıasatyna qatysty novellalar da bar. Máselen, jańa Konstıtýtsııada sybaılas jemqorlyqqa qarsy shekteýler aıtarlyqtaı kúsheıtilgen. Aıtalyq, 35-bapta sybaılas jemqorlyqqa qatysty qylmysy nemese quqyq buzýshylyǵy sot arqyly moıyndalǵan adamdardyń memlekettik organdar men jergilikti ózin-ózi basqarý organdaryna saılanýǵa quqyǵy joq ekeni kórsetilgen. Bul norma alǵash ret konstıtýtsııalyq deńgeıde bekitildi, — dedi Erlan Qarın.
Memlekettik keńesshi atalǵan reformalar Uıymmen aldaǵy kelissózder kezeńinde salmaqty negizdeme bolatynyn aıtty.
Erlan Qarın sybaılas jemqorlyqqa qarsy kúres salasynda halyqaralyq áriptestikti, sonyń ishinde GRECO aıasynda keńeıtýdiń máni zor ekenine nazar aýdaryp, elimizdiń ulttyq múddesi basymdyq bolyp qala beretinin eske saldy.
Memlekettik keńesshi «Zań jáne tártip» qaǵıdatyn odan ári nyǵaıtý sybaılas jemqorlyqqa qarsy kúrestegi barlyq baǵdarlamany iske asyrý barysyndaǵy mańyzdy baǵyt retinde saqtalatynyn atap ótti.
Buǵan deıin Memlekettik keńesshi Erlan Qarın Prezıdenttiń «Taza Qazaqstan» bastamasyn júzege asyrý máseleleri jóninde jıyn ótkizgen bolatyn.
