Elde jańartylatyn energııa kózderi qarqyndy damyp keledi
ASTANA. KAZINFORM — Búginde elimizde jalpy qýaty 3122 MVt bolatyn 156 JEK nysany jumys istep tur. Ótken jyly JEK arqyly óndirilgen elektr energııasynyń kólemi 7,58 mlrd kVt·saǵatty qurap, jalpy óndiristiń 6,43%-yn qamtydy. Bul týraly Energetıka mınıstrliginiń baspasóz qyzmeti habarlady.
2025 jyly jalpy qýaty 455 MVt bolatyn 9 jańa nysandy iske qosý josparlanǵan. Onyń úsheýi (90 MVt) qazirdiń ózinde paıdalanýǵa berildi. Qazaqstan sheteldik ınvestorlarmen tyǵyz jumys isteýde. Qazirgi tańda olardyń ınvestıtsııalyq jobalar portfeli shamamen 4,8 GVt. Jospar boıynsha 2035 jylǵa deıin elimizde keminde 8,4 GVt JEK qýaty iske qosylady.
Sonymen qatar shaǵyn kólemdegi elektr óndirý salasy da damyp keledi. Netto-tutynýshylar mehanızmi azamattar men bıznes ókilderine ózderiniń kún nemese jel elektr stantsııalaryn qoldanyp, artyq energııany elektr jelisine satyp, tabys tabýǵa múmkindik beredi. 2024 jyly mundaı kelisimsharttardyń sany 47-den 103-ke jetti. Al shaǵyn nysandardyń jalpy qýaty 6,2 MVt-qa deıin artty.
Qazaqstan turaqty damý maqsattaryna josparly túrde ilgerilep, energetıkalyq qaýipsizdigin nyǵaıtyp keledi. JEK jobalaryn júzege asyrý — energetıkalyq qaýipsizdikti nyǵaıtýǵa, jańa jumys oryndaryn ashýǵa, ınvestıtsııa tartýǵa jáne zamanaýı «jasyl» ekonomıkany qalyptastyrýǵa yqpal etedi.
Aıta ketelik elde Atomdyq jáne energetıkalyq qadaǵalaý men baqylaý komıteti quryldy.