Elde zańsyz júrgen 107 sheteldik ustaldy
NUR-SULTAN. QazAqparat – Kóliktegi polıtsııa qymetkerleri «Nelegal-2021» jedel-aldyn alý is-sharasynyń aıasynda Qazaqstan aýmaǵynda bolý erejelerin buzǵany úshin 107 sheteldikti ákimshilik jaýapkershilikke tartqan, dep habarlaıdy QazAqparat.
Kóliktegi polıtsııa departamenti bastyǵynyń birinshi orynbasary Qalıjan Qoblandınniń aıtýynsha, zań buzǵandardyń 102-si – TMD-nyń, beseýi – alys elderdiń azamattary.
«Shara kezinde Qyzylorda stansasyndaǵy jelilik polıtsııa bóliminiń qyzmetkerleri «Aqtóbe-Almaty» jolaýshylar poıyzynan Ózbekstan Respýblıkasynyń 31 jastaǵy azamatyn ustadi. Onyń ústinen Ákimshilik quqyq buzý týraly kodekstiń 517-babynyń 4-bóligi boıynsha ákimshilik hattama toltyrdy. Qyzylorda qalasynyń mamandandyrylǵan ákimshilik sotynyń sheshimimen quqyq buzýshyǵa 25 AEK kóleminde aıyppul salyndy. Sondaı-aq, sot qaýlysymen Qazaqstan Respýblıkasynan tys jerlerge 27 sheteldik shyǵaryldy», - deıdi Kóliktegi polıtsııa qyzmetiniń ókili.
Budan bólek quzyrly organǵa sheteldikterdiń el aýmaǵyna ótkeni týraly 3 kún ishinde habarlamaǵany úshin 22 qazaqstandyq ákimshilik jaýapkershilikke tartylǵan.
Qalıjan Qoblandın 5-12 shilde aralyǵynda ótken shara kezinde kóshi-qon zańnamasyn buzǵany úshin ustalǵan TMD elderiniń 3 azamaty óz eliniń qabyldaý-taratý ornyna qamalǵanyn aıtady.
