Elde zańsyz oıyn bıznesi tómendedi

ASTANA. KAZINFORM – Bas prokýratýrada onlaın-kazınolarǵa qarsy is-qımyl jáne zańsyz oıyn qyzmetimen baılanysty qarjylyq aǵyndardy buǵattaý máseleleri boıynsha vedomstvoaralyq májilis ótti. 

Jıynǵa Ulttyq bank, Týrızm jáne sport mınıstrligi, sondaı-aq basqa da múddeli memlekettik organdardyń ókilderi qatysty.

Internette zańsyz qumar oıyndardyń aýqymdy taralýynan týyndaǵan ózekti qaýipter talqylanyp, qarsy is-qımyldyń tıimdiligin arttyrýdyń birlesken tásilderi ázirlendi.

Májilistiń qorytyndysy boıynsha tıisti memlekettik organdarǵa tsıfrlyq baqylaý, qarjylyq monıtorıng jáne zańsyz áreketterge tosqaýyl qoıý bóliginde qosymsha sharalar qabyldaý tapsyryldy.

— Bıyl zańsyz oıyn bıznesin uıymdastyrý faktileriniń 22,2%-ǵa (45-ten 32-ge deıin) tómendeýi baıqalady. Onlaın-kazınolardy toltyrýǵa arnalǵan 50-den astam bank shottary anyqtalyp, buǵattaldy, — delingen habarlamada.

Tyıym salynǵan ınternet-resýrstarǵa qol jetkizýdi shekteý jóninde belsendi jumys jalǵasyp jatyr.

Degenmen, osy qylmystar qater tóndirýde jáne den qoıýdyń júıeli sharalaryn talap etedi.

Bas prokýratýra zańsyz oıyn bıznesin uıymdastyrǵan úshin múlik tárkilenip, jeti jylǵa deıin bas bostandyǵynan aıyrý túrindegi jazany qarastyratyn Qylmystyq kodekstiń 307-baby boıynsha qylmystyq jaýaptylyq týraly eskertedi.