Elde sýǵa ketkender sany 29%-ǵa azaıdy
ASTANA. KAZINFORM — Qazaqstannyń sý aıdyndarynda adam shyǵyny sońǵy úsh jylda 29 paıyzǵa tómendegen. Tótenshe jaǵdaılar mınıstrligi bul kórsetkishke qutqarýshylardy zamanaýı tehnıkamen jaraqtandyrý jáne jasandy ıntellektini engizý arqyly qol jetkizilgenin habarlady.
Vedomstvo málimetinshe, elimizde sýǵa ketý faktileriniń turaqty tómendeýi baıqalady. Eger 2023 jyly shomylý maýsymynda 176 adam sýǵa ketken bolsa, 2025 jyldyń qorytyndysy boıynsha bul kórsetkish 125-ke deıin azaıǵan.
Alaıda kámeletke tolmaǵandardyń qaza bolýy áli de ózekti másele. Statıstıka kórsetkendeı, sońǵy 3 jylda sý aıdyndarynda 142 bala mert bolǵan. Qutqarýshylardyń aıtýynsha, bul qaıǵyly jaǵdaılardyń basym bóligine ata-analardyń salǵyrttyǵy men balalardy qaraýsyz qaldyrýy sebep.
Bıylǵy shomylý maýsymyndaǵy basty jańashyldyq — tsıfrlyq baqylaý júıelerin engizý. Qazirgi tańda Almaty men Qonaev qalalarynyń jaǵajaılarynda jasandy ıntellekt elementteri bar beınebaqylaý kameralary synaqtan ótip jatyr.
— Bul júıeler júzý aımaǵynyń shekarasyn avtomatty túrde anyqtaıdy. Eger adam belgilengen qaýipti aımaqtan asyp ketse, júıe birden sırena qosyp, kezekshi qutqarýshylarǵa dabyl soǵady. Sonymen qatar elimizdiń 10 óńirinde jaǵalaý syzyqtary qutqarý jasaqtarynyń dıspetcherlik bólimderine qosylǵan. Baqylaý jumystaryna sırena men jylý kameralary ornatylǵan drondar da belsendi tartyldy, — dep atap ótti vedomstvo ókilderi.
Sýdaǵy qaýipsizdikti qamtamasyz etýde materıaldyq-tehnıkalyq bazanyń jańarýy da mańyzdy ról atqardy. Sońǵy eki jylda respýblıkalyq bıýdjet esebinen 200 birlik arnaıy tehnıka satyp alynǵan.
Qazirgi ýaqytta TJM qutqarý bólimsheleriniń ıeliginde 13 myńnan astam avarııalyq-qutqarý jabdyǵy (gıdrokostıýmder, baılanys quraldary, medıtsınalyq jabdyqtar) men 497 júzý quraly (motorly qaıyqtar men katerler) bar.
Búginde elimizde shomylýǵa ruqsat etilgen 733 oryn belgilense, 5 myńnan astam ýchaske qaýipti dep tanylǵan.
— Ótken jyldyń ózinde 5 myńnan astam adam ákimshilik jaýapkershilikke tartyldy. Eske sala keteıik, sý aıdyndaryndaǵy qaýipsizdik qaǵıdalaryn buzǵan jeke tulǵalarǵa 7 AEK mólsherinde aıyppul qarastyrylǵan, — dep eskertedi ІІM ókilderi.
Aıta keteıik, buǵan deıin Alakólde alǵash ret ámbebap qutqarý bólimshesi ashylǵanyn habarlaǵan edik.
