Elde kóshedegi valıýta tablosyna tyıym salyndy

ASTANA. KAZINFORM — Qazaqstanda valıýta baǵamy týraly aqparattyq stend (tablo) aıyrbastaý pýnkitiniń ishinde nemese kassa janynda bolýy kerek. 

Osy qaýly shilde aıynyń basynda jarııalanǵan edi. Bul tártip eki aı ótkennen keıin, ıaǵnı 2025 jylǵy 9 qyrkúıekten bastap kúshine endi. 

Aqparattyq stendti (tablo) aıyrbastaý pýnktinen tys jerde, onyń ishinde ǵımarat pen mekemeniń shatyrynda, syrtqy qabyrǵasynda, statsıonarlyq, jyljymaly jáne tasymaldanatyn stendter ornalastyrýǵa jol berilmeıdi. Jańa tártipke sáıkes, aqparattyq stend, ıaǵnı valıýta baǵamy kórsetilgen tablo kóshede ashyq keńistikke qoıylmaýy tıis.

Biraq, valıýta aıyrbastaý pýnkti kópfýnktsııanaldy maqsattaǵy ǵımarattar men qurylystarda (onyń ishinde iskerlik ortalyqtar), vokzal, kazıno aýmaǵynda, áýejaı ishinde, sondaı-aq Qazaqstan Respýblıkasynyń memlekettik shekarasy arqyly ótetin avtomobıl, teńiz jáne ózen beketteri aýmaǵynda ornalasqan jaǵdaıda, tabloǵa ruqsat etiledi.

Eske salsaq, Ulttyq bank tóraǵasy Tımýr Súleımenov kóshedegi valıýta baǵamynyń kestelerin ilýge nege tyıym salyp jatqandaryn túsindirgen bolatyn. 

Sonymen qatar, Ulttyq bank valıýta baǵamynyń tablosyn ǵımarat ishine kirgizbegen aıyrbastaý beketterine qandaı shara qoldanylatynyn aıtty. 

Jańa talaptardy saqtamaǵany úshin aıyppul mólsheri 3-ten (11 796 teńge -red.) 5 aılyq eseptik kórsetkishke (19 660 teńge) deıin barýy múmkin.