Elde elektr stantsııalaryndaǵy apat sany artty
ASTANA. QazAqparat – «KEGOC» elektr jelilerin basqarý jónindegi Qazaqstan kompanııasy» AQ basqarma tóraǵasy Qanysh Moldabaev bıylǵy jyldyń basynan beri Qazaqstandaǵy elektr stansalarynda apat sany kóbeıgenin aıtty, dep habarlaıdy QazAqparat tilshisi.
Onyń aıtýynsha, kompanııa 220-500 kV joǵary jáne asa joǵary kerneýli 27 myń shaqyrymdyq respýblıkalyq elektr jelilerine qyzmet kórsetedi.
«Bıylǵy jyldyń basynan beri Qazaqstandaǵy elektr stantsııalaryndaǵy apattar sany kóbeıgen. Apattyq aıaldamalar sany 16 %-ǵa ósti. Aıaldamalar uzaqtyǵynyń artýy 18,5%-dy qurady. Bloktyq elektr stantsııalary men óńirlik elektr stansalarynda apat deńgeıiniń aıtarlyqtaı ósýi tirkeldi», - dedi Qanysh Moldabaev.Onyń aıtýynsha, qazirgi ýaqytta elektr stantsııalarynyń jeke generatsııasy halyqtyń jáne el ekonomıkasyna qajetti energııa qajettiligin jabý úshin jetkiliksiz. Ol 8 jeltoqsanda eń kóp tutyný 16 myń mVt bolǵan kezde menshikti generatsııa shamamen 14 800 mVt quraǵanyn atap ótti.
Kompanııa basshysynyń aıtýynsha, elimizdegi elektr stantsııalarynyń belgilengen qýaty 24 000 mVt bolsa, jumys istep turǵan qýaty nebári 14 700 mVt.
«Qazaqstannyń elektr stantsııalary halyqtyń jáne el ekonomıkasynyń elektr energııasyna degen suranysyn tolyq qamtamasyz ete alatyndaı jaǵdaı jasaý kerek», - dep qosty Qanysh Moldabaev.
