Aqtóbelik shendiler 100 mlrd teńgelik jobada ınvestorǵa kedergi keltirgen
ASTANA. KAZINFORM – Aqtóbe qalasynyń prokýratýrasy elektr stantsııasyn salý boıynsha strategııalyq mańyzdy jobany iske asyryp jatqan «Energy Flow Generation» JShS-niń quqyqtaryn qalpyna keltirdi.
Jobanyń jalpy ınvestıtsııa kólemi 100 mlrd teńgeni quraıdy. Bul bastapqy kezeńniń ózinde 100-den astam jańa jumys ornyn ashýǵa jáne óńirdiń energetıkalyq táýelsizdigin nyǵaıtýǵa múmkindik beredi.
Másele ınvestor ókilderi Aqtóbe qalasynyń prokýrory Baqytjan Eshmaǵanbetovtiń jeke qabyldaýynda kóterilgen. Tekserý barysynda jergilikti ákimdik 35 gektar jer ýchaskesiniń nysanaly maqsatyn ózgertýge zańsyz túrde bas tartqany anyqtaldy. Bas tartý sebebi qalanyń Bas josparyna sáıkes kelmeýimen negizdelgen.
Alaıda jan-jaqty zerdeleý nátıjesinde atalǵan jer teliminiń negizgi bóligi óndiristik aımaqta ornalasqany belgili boldy.
Prokýrorlyq qadaǵalaý aktisi negizinde jergilikti atqarýshy organnyń zańsyz sheshimi kúshin joıyp, ákimshilik kedergiler joıyldy.
Sonymen qatar kásipkerlik qyzmetke zańsyz kedergi keltirgeni úshin kináli laýazymdy tulǵa Qazaqstan Respýblıkasynyń Ákimshilik quqyq buzýshylyq týraly kodeksiniń 173-baby boıynsha ákimshilik jaýapkershilikke tartyldy.
Qazirgi ýaqytta ınvestıtsııalyq jobany iske asyrý jalǵasýda.
Aqtóbe oblysynyń prokýratýrasy ınvestorlardy quqyqtyq máseleler boıynsha +7 (777) 220-10-77 telefony arqyly nemese 115 Call-ortalyǵyna habarlasýǵa shaqyrady.
Aıta keteıik, jaqynda ǵana Prezıdent zańdy bıznesti negizsiz toqtatý ınvestıtsııalyq ahýalǵa zııan keltiretinin aıtqan bolatyn.
