Elde astyq tasymaldaý kólemi 40%-ǵa artty

ASTANA. KAZINFORM —  2025 jylǵy toǵyz aıdyń qorytyndysy boıynsha Qazaqstanda astyq júkterin tasymaldaý kólemi 9,5 mln tonna boldy. Bul kórsetkish ótken jyldyń sáıkes kezeńimen salystyrǵanda 40%-ǵa artyq (2024 jyly – 6,8 mln tonna). 

Jalpy kólemniń 7,3 mln tonnasy eksportqa jóneltildi (+43%), al 2,2 mln tonnasy ishki baǵyttar boıynsha tasymaldandy (+33%). Barlyq negizgi baǵytta turaqty oń dınamıka baıqalady.

Atap aıtqanda, 2,2 mln tonna jemshóp tasymaldandy. Kórsetkish ótken jylmen salystyrǵanda 4,6 ese artyq. Bul óńdeý salasynyń damýyn jáne qosylǵan quny joǵary taýarlar óndirisiniń ilgerileýin kórsetedi.

Ortalyq Azııa elderine (Ózbekstan, Tájikstan, Túrikmenstan, Qyrǵyzstan) tasymaldaý kólemi 34%-ǵa artty. Aqtaý jáne Quryq porttary arqyly Iran baǵytyna tasymaldaý qaıta jandanyp, 3,3 ese ósip, 0,7 mln tonna boldy. Aýǵanstanǵa jetkizý kólemi 40%-ǵa ósip, 179 myń tonnaǵa jetti.

Eksporttyń ózge baǵyttary boıynsha da aıtarlyqtaı ósim baıqalady:

• Reseı – 4,2 ese (1,7 mln tonna);
• Ázerbaıjan – 108 ese (542 myń tonna);
• Baltyq elderiniń porttary – 14 ese (606 myń tonna);
• Reseıdiń Baltyq elderindegi porttary – 2,4 ese (132 myń tonna);
• Qara teńiz porttary – 1,4 ese (256 myń tonna).

Qazaqstan sondaı-aq jańa eksporttyq baǵyttardy ashty. Olardyń qatarynda Afrıka elderi (Marokko, Aljır), Vetnam jáne Eýropalyq Odaq memleketteri bar.

Astyq júkterin tasymaldaý jumysyn úılestirý jáne máselelerdi jedel sheshý úshin Kólik mınıstrligine qarasty jedel shtab jumys isteıdi. Onyń quramyna Aýyl sharýashylyǵy mınıstrliginiń, Memlekettik kirister komıtetiniń, «QTJ» UK» AQ, «KTZ Express», «Astyq Trans», «Prodkorporatsııa» UK, Qazaqstan astyq odaǵy, sondaı-aq Aqtaý jáne Quryq porttarynyń ókilderi kiredi.

Aıta ketelik elde 26,3 mln tonna astyq bastyrylǵan edi.