Respýblıkadaǵy 36 Dostyq úıi jasampaz bastamalardyń mańyzdy ortalyǵyna aınaldy - Balaeva
ASTANA. KAZINFORM — Premer-mınıstrdiń orynbasary – Mádenıet jáne aqparat mınıstri Aıda Balaeva qazaqstandyqtardy Qazaqstan halqynyń birligi merekesimen quttyqttady.
— Bul merekeniń el ómirinde alar orny erekshe. Halyq birligi, ortaq tarıhı taǵdyr, teńdik pen tatýlyq ıdeıalary jańa Halyqtyq Konstıtýtsııada da kórinis tapqan. Ata zańnyń preambýlasynda «Biz, birtutas Qazaqstan halqy…» degen tujyrymnyń, birlik pen yntymaq, etnosaralyq jáne konfessııaaralyq tatýlyq qaǵıdattarynyń saqtalýynyń ózi tereń mánge ıe. Bul birlik, yntymaq pen syılastyqtyń qoǵam úshin ǵana emes, Qazaqstannyń aldaǵy damýy úshin de berik negiz ekenin aıqyndaıdy, — dedi Aıda Balaeva.
Memleket basshysy etnosaralyq kelisim men halyq birligi memlekettik saıasattyń asa mańyzdy baǵyttarynyń biri ekenin, ádildik pen barlyq azamatqa teń múmkindik berý — Ádiletti Qazaqstannyń basty qaǵıdaty ekenin únemi aıtyp keledi.
— Búginde elimizde júzden astam etnos ókili beıbitshilik, senim jáne túsinistik jaǵdaıynda ómir súrip jatyr. Qazaqstanda myńnan astam etnomádenı birlestik pen tórt myńnan asa qoǵamdyq qurylym jumys isteıdi. Olar halyq birligin nyǵaıtýǵa, mádenıetaralyq dıalogty damytýǵa jáne halqymyzdyń baı rýhanı murasyn saqtaýǵa eleýli úles qosyp keledi.
Qazaqstanda barlyq etnostyń mádenıetin, tilin jáne dástúrin damytýǵa qajetti jaǵdaı jasalǵanyn atap ótkim keledi. Respýblıka boıynsha jumys isteıtin 36 Dostyq úıi qoǵamdyq kelisimniń, mádenı almasýdyń jáne jasampaz bastamalardyń mańyzdy ortalyǵyna aınaldy.
Birlik, kelisim men syılastyq aldaǵy ýaqytta da Qazaqstannyń órkendeýine, halqymyzdyń ál-aýqatynyń artýyna berik negiz bolady dep senemin.
Aıtýly mereke kúni barshańyzǵa zor densaýlyq, baq-bereke, ár shańyraqqa beıbitshilik pen baqyt, yrys-yntymaq jáne tolaıym tabys tileımin, — dep jazdy Premer-mınıstrdiń orynbasary — Mádenıet jáne aqparat mınıstri Aıda Balaeva.
Aıta ketelik Memleket basshysy Qasym-Jomart Toqaev Qazaqstan halqynyń birligi merekesimen quttyqttaǵan edi.
