Elbasynyń úndeýi bolashaqqa baıandy qadam - Janádilov
TALDYQORǴAN. QazAqparat - Búkil qazaqstandyqtardyń qatysýymen júzege asatyn jańa reformany jarqyn bolashaqqa jasalyp otyrǵan baıandy qadam retinde baǵalaımyn. Memleket basshysynyń úndeýine qatysty Qazaqstannyń qurmetti jýrnalısi Meıram Janádilov osyndaı pikir bildirdi, dep habarlaıdy QazAqparat tilshisi.
«Elbasymyz Nursultan Nazarbaevtyń bılik tarmaqtary arasynda ókilettikterdi qaıta bólý máseleleri jónindegi úndeýimen muqııat tanysyp shyqtym. Osynaý asa mańyzdy saıası qujat táýelsiz memleketimizdiń demokratııalyq ósip-órkendep kele jatqandyǵyn kezekti ret aıqyndap otyr dep esepteımin. Úndeýde aıtylǵandaı, kúshti prezıdenttik vertıkal bizge memleketti qalyptastyrýdaǵy alǵashqy qıyndyqtardy eńserý kezeńinde qajet boldy. Osy kezeńde ózimiz búginde maqtanyshpen aıtyp júretin qanshama jetistikterge qol jetkizildi deseńizshi! Ult kóshbasshysy osy qol jetkenmen toqtap qalmaı, saıası júıeni odan ary demokratııalandyrý qadamyn jasap otyr. Munyń ózi memleketti basqarý júıesiniń tıimdiligin barynsha arttyryp, elimizdiń álem aldyndaǵy bedelin burynǵydan da joǵarylata túsetindigi sózsiz.
Nursultan Ábishulynyń: «Men Prezıdent ıe ókilettikterdiń aıtarlyqtaı bóligin berýge sanaly túrde baryp otyrmyn. Men muny jalǵyz ǵana maqsatpen - eldi basqarýdyń neǵurlym tıimdi, ornyqty, zamanaýı júıesin qurý úshin jasap otyrmyn»,- degen sózderi bul tujyrymymyzdy odan ary aıqyndaı túsedi.
Osyndaı túbegeıli ózgeristerdi júzege asyrý arqyly memlekettik qurylystyń bógde eshbir modelderine uqsamaıtyn óz memleketimizdi, jaýapkershilik pen biliktilikti basty orynǵa qoıatyn Úkimet pen Parlamentti qalyptastyratynymyz sózsiz. Munyń ózi bolashaq tolymdy tabystarymyzdyń kepili bolmaq»,- deıdi Janádilov.
