Elbasynyń eńbegin eldiń yqylasyna qarap baǵalar bolar - A. Tólepbergenov
ASTANA. 27 jeltoqsan. QazAqparat /Qanat Mámetqazyuly/ - Elbasynyń eńbegin eldiń yqylasyna qarap baǵalar bolar.
Búgin Astana qalalyq Qazaqstan halqy Assambleıasynyń uıymdastyrýymen ótkizilgen «N. Nazarbaev - ult birligi men Qazaqstannyń jarqyn bolashaǵynyń negizin qalaýshy» taqyrybyndaǵy jıyn barysynda «Alash rýhy Saryarqa» qoǵamdyq birlestiginiń tóraǵasy Amanbek Tólepbergenov osylaı málim etti.
Esterińizge sala keteıik, atalǵan jıyn QR Prezıdentiniń ókilettigin uzartý jóninde referendým ótkizý týraly bastamany qoldaý maqsatynda ótkizilip otyr.
«Qazaqstan halqy táýelsizdik alǵan 19 jyl ishinde barǵan saıyn nyǵaıyp, asqaraly asýlardy baǵyndyryp keledi. Kelesi jyly el Táýelsizdiginiń 20 jyldyǵyn toılaǵaly otyrmyz. Bul tarıh úshin qas qaǵym sát bolýy múmkin. Alaıda, osy ýaqyt ishinde qazaq eli ǵasyrlar aralyǵynda atqarylar belesterdi eńserdi. Ustanymyn da qalyptastyryp úlgerdi. Qazaqstan alash jurtynyń álimsaqtan kele jatqan mámilegerlik qasıetine basymdyq berip, ony búginde halyqaralyq deńgeıde kótere bildi», - degen birlestik basshysy bundaı parasattylyqtaǵy Elbasynyń kóregendigine erekshe toqtalyp ótti.
Onyń aıtýynsha, tarıh úshin qysqa merzimde qol jetkizilgen iri jetistikterdiń barshasy Prezıdent N. Nazarbaevtyń eren eńbegimen birge keldi. «Qazaqstan Memleket basshysynyń qaıratkerlik qoltańbasyna álemniń apaıtós tulǵalary áldeqashan oń baǵasyn berip qoıǵan. Sondyqtan da, el-jurty Qazaqstannyń aldaǵy baǵyndyrar bıikterin Elbasynyń esimimen baılanystyrady. Prezıdenttiń ókilettigin uzartý jónindegi referendýmnyń bastamashyl tobyn qurý da osyndaı maqsattan týyndap otyr. Referendým barysynda Qazaqstan halqy óz tańdaýyn jasaıtyny anyq. Jalpy, Elbasynyń eńbegin eldiń yqylasyna qarap baǵalar bolar. Eldegi turaqtylyq, halyqtyń birligi, ekonomıkadaǵy ósim, ulttyń órkendeýi - N. Nazarbaevtyń qajyrlyǵynyń arqasynda júzege asty. Aldaǵy baǵyndyrar belesimiz budan da bıik bolmaq», - dedi A. Tólepbergenov.
