Elbasy AÓІSShK-niń mereıtoılyq sammıtin ashady
ASTANA. 12 qyrkúıek. QazAqparat - Búgin Astanada Azııadaǵy ózara is-qımyl jáne senim sharalary keńesiniń 20 jyldyǵyna arnalǵan Keńestiń mereıtoılyq sessııasy men syrtqy ister mınıstrleriniń tórtinshi kezdesý ótedi.
Memleket basshysy Nursultan Nazarbaev Astanadaǵy mereıtoılyq sammıtti ashady dep kútilýde.
Mereıtoılyq sessııa barysynda Taıaý Shyǵystaǵy jáne Soltústik Afrıkadaǵy, Aýǵanstandaǵy jaǵdaı, jappaı qyryp-joıatyn qarýlardy taratpaý, transulttyq qylmysqa qarsy turý, sondaı-aq AÓІSShK aýqymyndaǵy ekonomıkalyq yntymaqtastyqtyń basymdyqtary sııaqty ózekti taqyryptar boıynsha pikir alysý kózdelýde.
Kezdesýge Azııadaǵy ózara is-qımyl jáne senim sharalary jónindegi keńestiń 24 múshe-elderiniń delegatsııasy qatysady. Qonaq retinde 8 memlekettiń syrtqy ister mınıstrleri jáne 14 halyqaralyq uıymdar basshylary shaqyryldy. Forým sheńberinde Qazaqstannyń syrtqy ister mınıstri Erjan Qazyhanov pen birqatar memleketterdiń syrtqy saıasat vedomstvosy basshylarynyń kezdesýleri josparlanǵan.
Sessııa qorytyndysynda mınıstrler mereıtoılyq kezdesýiniń deklaratsııasy qabyldanatyny kútiledi. Qujat Azııada beıbitshilik pen qaýipsizdikti nyǵaıtý jónindegi Keńestiń kúsh-jigerine jańa serpin bermek.
Toqtala ketetin jaıt, 2014 jylǵa deıin Túrkııa Azııadaǵy ózara is-qımyl jáne senim sharalary keńesi Syrtqy ister mınıstrler keńesiniń tóraǵasy bolyp tabylady. 2014 jyldan bastap tóraǵalyq Qytaı Halyq Respýblıkasyna kóshedi.
Esterińizge sala keteıik, 5 qazanda QR Prezıdenti Nursultan Nazarbaevtyń BUU Bas Assambleıasynyń minberinen Azııadaǵy ózara is-qımyl jáne senim sharalary keńesin qurý jóninde bastama usynǵanyna 20 jyl tolady. Búgingi kúni Azııadaǵy ózara is-qımyl jáne senim sharalary jónindegi keńeske Ázerbaıjan, Aýǵanstan, Bahreın, Vetnam, Egıpet, Úndistan, Irak, Iran, Izraıl, Iordanııa, Qazaqstan, Kambodja, Qytaı, Qyrǵyzstan, Mońǵolııa, BAÁ, Palestına, Pákistan, Reseı, Tájikstan, Taıland, Túrkııa, Ózbekstan, Koreıa Respýblıkasy kiredi. AQSh, Ýkraına, Indonezııa, Malaızııa, Katar, Bangladesh, Fılıppın, sondaı-aq BUU, Arab memleketteriniń Lıgasy jáne EQYU baqylaýshy mártebesine ıe.
