El tiregi - úlgili otbasy

ASTANA. QazAqparat - Memlekettik hatshy Gúlshara Ábdiqalyqovanyń tóraıymdyǵymen «Mereıli otbasy» ulttyq konkýrsynyń laýreaty ataǵyn berý jónindegi komıssııanyń otyrysy ótti. Otyrysta sóılegen sózinde Memlekettik hatshy «Mereıli otbasy» ulttyq konkýrsynyń Qazaqstan Prezıdenti Nursultan Nazarbaevtyń bastamasymen ótkizilip kele jatqanyn, onyń aýdandyq, óńirlik jáne ulttyq sekildi úsh kezeńdi qamtıtynyn atap ótti, dep jazady «Egemen Qazaqstan» gazeti.

Sondaı-aq, Memlekettik hatshy Qa­zaq­stan Táýelsizdiginiń 25 jyldy­ǵynda úlgili otbasylardy tańdaý barysynda olardyń memlekettiń qalyptasýy men órkendeýine qosqan úlesteri eskeriletinin aıtty. «Elbasy Otannyń birligi otbasynyń birliginde ekenine nazar aýdara otyryp, eldiń damýy men Táýelsizdiktiń nyǵaıýynda otbasylyq ınstıtýttyń róli men mańyzy aıryqsha ekenin atap ótken bolatyn. Mine, elimizde 2014 jyldan beri «Mereıli otbasy» konkýr­sy uıymdastyrylyp keledi. Oǵan qatysýshylardyń da sany kóbeıýde. Bul konkýrs jergilikti óńirlerdiń óz dás­túrlerine, erekshelikterine sáıkes ótkizilýde. Otbasy - memle­ket­tiń mańyzdy tiregi. Bıyl bizdiń elimiz óz Táýelsizdiginiń 25 jyl­dy­ǵyn atap ótedi. Osyǵan oraı, biz kon­kýrs­qa qatysýǵa nıet tanytqan otbasy­lardyń, olardyń árbir múshesiniń Qazaqstannyń damýy men órkendeýine qosqan úlesterin saralap, saraptaıtyn bolamyz», dedi G.Ábdiqalyqova.

Memlekettik hatshy otyrys qorytyndysy boıynsha memlekettik organdarǵa baıqaýdy ári qaraı uıymdastyrý máseleleri jóninde birqatar tapsyrma berdi.

Atalǵan konkýrs, eń aldymen, otbasy ınstıtýtyn nyǵaıtýǵa, adamgershilik pen otbasylyq qun­dylyq­tardy qasterleýge, aǵa býyndy qur­metteýdi jáne balalarǵa izet kórse­týdi dáripteýge baǵyttal­ǵany belgili. Sondyqtan, oǵan eńbek­te, zııatkerlikte, ǵylymda, shyǵarma­shylyq pen sportta joǵary jetistik­terge qol jetkizgen otbasylary qatysa alady. Baıqaý úzdikterin anyqtaý otbasy músheleri jetistikteriniń máni, rýhanı-adamgershilik qundylyqtar men shynaıy otbasylyq dástúrlerdi ustanýshylyq, ómir súrý salty men qoǵamdaǵy abyroı-bedeli sekildi ólshemderge sáıkes júzege asyrylatyn bolady.

Bıylǵy jyldyń maýsym aıyn­da elimizdiń barlyq óńirinde ekin­shi kezeńniń jeńimpazdaryn mara­pat­taýdyń saltanatty rásimderi ótkizilip, árbir oblystan, Astana jáne Almaty qalalarynan úshinshi, ıaǵnı ulttyq kezeńge qatysý úshin eki otbasydan anyqtalǵan eken. Konkýrstyń ulttyq kezeńine daıyndyq aıasynda komıssııa músheleri fınalǵa qatysatyn 16 úmitkerdi belgilegen, sonymen qa­tar, konkýrstyń jeńimpazyna tabys­talatyn dıplomdar men músinshi­lerdiń eskızderin bekitken. «Mereıli otbasy» baıqaýynyń fınaldyq kezeńiniń jeńimpazdaryn anyqtaýǵa elimizdiń barsha azamaty onlaın-daýys berý arqyly telefon boıynsha, kaztube.kz portalynda, son­daı-aq, SMS-habarlama joldaý ar­qyly tikeleı qatysa alady. Daýys berý bıylǵy jyldyń 2-9 qyr­kúıegi aralyǵynda ótkizilip, onyń qory­tyndysy sol aıdyń ekinshi jeksenbisi - Otbasy kúni qarsańynda jarııalana­tyn bolady. Baıqaýdy Qazaqstan Res­pýblıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ult­tyq komıssııanyń, sondaı-aq, Astana, Almaty qalalarynyń jáne oblys ákimderi janyndaǵy otbasylyq-demografııalyq saıasat jónindegi ko­mıssııalardyń qoldaýymen Má­de­nıet jáne sport, Aqparat jáne kom­mý­nıkatsııalar mınıstrlikteri uıym­dastyrady.

Otyrys aıasynda jýrnalısterge bergen suhbatynda Qazaqstan Res­pýb­lıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ult­tyq komıssııa tóraıymynyń orynbasary Lázzat Súleımenova «Mereıli otbasy» konkýrsynyń aýqymy jyldan jylǵa keńeıip kele jatqanyn jetkizdi. «Onyń negizgi maqsaty - otbasy ınstıtýtyn nyǵaıtý. Bıylǵy jyly 2600-ge tarta otbasy konkýrsqa qatysý úshin óz qujattaryn tapsyrdy. Búginde aýdandyq, qalalyq, oblystyq deńgeıdegi konkýrstardyń qorytyndylary shyqty. Qazirgi ýaqytta konkýrsty ótkizý respýb­lıka­lyq deńgeıge jetip otyr. Baıqaý­ǵa jalpy 110-nan astam ult ókilderi qatysýda. «Mereıli otbasynyń» eli­miz­diń memlekettiligi men otbasy ınstı­týtyn bekitýdegi, jastardy tárbıe­leýdegi yqpaly zor dep oılaımyn», dedi ol.

Al atalǵan komıssııanyń taǵy bir múshesi Saltanat Baıqoshqarova bul baıqaýdyń úlgili otbasylardy qoǵamǵa, jastarǵa nasıhattaýdaǵy róli orasan ekenin aıtty.

Láıla EDІLQYZY,

«Egemen Qazaqstan»