«EL jastar» eksperımentaldy-laboratorııalyq teatry alǵashqy qoıylymyn sahnalady
«Rýhanı jańǵyrý» baǵdarlamasynyń Óńirlik jobalyq keńsesiniń qoldaýymen Kókshetaý qalasynyń «Dostar» mádenıet saraıynda sahnalanǵan «Armandar kemesi» qoıylymy bashqurttyń tanymal jas jazýshysy Aıgız Baımýhametovtiń «Tastamashy meni, Ana» povesi negizinde alynǵan.
Shyǵarmada búgingi qoǵamdaǵy balalardyń áleýmettik máselesi qamtylǵan. San túrli minezder, túrli taǵdyrlar ómir shyndyǵynan batyl alynyp, shyǵarma jelisinde tereń sıpat alady.
Teatr premerasyn kópshilikpen birge belgili jazýshy, jýrnalıst, Reseı Jazýshylar odaǵynyń múshesi, Shaıhzada Babıch atyndaǵy Bashqurtstan Respýblıkasy syılyǵynyń laýreaty, teatr qoıylymyna negiz bolǵan «Tastamashy meni, Ana» povesiniń avtory Aıgız Baımýhametov, Qazaqstannyń halyq ártisi, kınorejısser Talǵat Temenov, jazýshy-dramatýrg, Qazaqstannyń eńbek sińirgen qaıratkeri Jabal Erǵalıev jáne Aqmola oblystyq Іshki saıasat basqarmasynyń basshysy Gúljanar Shókeeva tamashalady.
Aıta keteıik, «EL jastar» eksperımentaldy-laboratorııalyq teatry Jastar jyly aıasynda jáne Aqmola oblysy Іshki saıasat basqarmasynyń qoldaýymen «Aldaspan-Rýh» qoǵamdyq birlestigi janynan ashylǵan bolatyn. Jastar teatryn uıymdastyrý isin Kókshetaý jurtshylyǵyna esimi belgili rejısser Farhatbek Kanafın men jas teatrtanýshy, Aqan seri atyndaǵy Kókshetaý joǵary mádenıet kolledjiniń oqytýshysy Hákim Hasambaı qolǵa alǵan.
