Ekonomıkalyq qylmys: Almatyda 47 mlrd teńge qaıtaryldy

ALMATY. KAZINFORM – Almaty qalasynyń Óńirlik kommýnıkatsııalar qyzmetiniń alańynda Ekonomıkalyq tergeý departamenti jumysynyń bıylǵy nátıjeleri aıtyldy. Almaty qalasy boıynsha Ekonomıkalyq tergeý departamentiniń basshysy Danııar Aqjanovtyń aıtýynsha, jyl basynan beri Almatyda 111 ekonomıkalyq qylmys tirkelgen, onyń 79-y sotqa jiberildi.

– Aýyr qylmystar boıynsha 68 jaǵdaı tirkeldi. Tergeý nátıjesinde 47,7 mlrd teńge qaıtaryldy. Aqshany jylystatý jáne zańsyz áreketterdi qarjylandyrý úshin jıi qoldanylatyn tsıfrlyq aktıvterdiń zańsyz aınalymymen kúresýge basa nazar aýdarylady. 2023 jylǵy 6 aqpanda kúshine engen «QR-daǵy Tsıfrlyq aktıvter týraly» jańa Zańǵa sáıkes Qazaqstan aýmaǵynda «Astana» halyqaralyq qarjy ortalyǵynyń aýmaǵyn qospaǵanda, qamtamasyz etilmegen tsıfrlyq aktıvterdi shyǵarýǵa tyıym salynady, - dedi Danııar Aqjanov.

Sonymen qatar spıker qazirgi ýaqytta krıptovalıýta kóleńkeli onlaın naryqtarda belsendi qoldanylatynyn atap ótti. 

Onyń aıtýynsha, qazirgi ýaqytta departament 58,5 mln AQSh dollarynan astam somaǵa tsıfrlyq aktıvterdi aıyrbastaý jónindegi zańsyz qyzmetke baılanysty alty qylmystyq isti tergep jatyr. Aldyn alý maqsatynda «Kıbernadzor» júıesi arqyly osyndaı qyzmetpen aınalysatyn 134 ınternet-resýrs buǵattaldy. Sondaı-aq  krıptovalıýtany zańsyz paıdalaný jaǵdaılaryn belsendi túrde zertteıtin tsıfrlyq aktıvter salasyndaǵy quqyq buzýshylyqtarmen kúresý úshin arnaıy «Krıpton» bólimshesi quryldy. 

Eske salaıyq, buǵan deıin quqyǵy buzylǵan almatylyq tutynýshylar bıyl 300 mln teńge qaıtaryp alǵanyn jazǵanbyz.