Eki oblysta gazdyń baǵasy arzandamaıdy - UEM sebebin aıtty

ASTANA. QazAqparat - 2019 jyly 1 qańtardan bastap barlyq kommýnaldyq tarıfter tómendeıdi. Sonyń ishinde gazdy jetkizý qyzmeti de bar, dep xabarlaıdy QazAqparat tilshisi.

QR Ulttyq ekonomıka vıtse-mınıstri Serik Jumanǵarınniń aıtýynsha, gazdy tutynyp otyrǵan 11 óńirdiń 9-ynda tarıfter tómendeıdi.

Máselen, Almaty obysynda bir tekshe metr gazdyń baǵasy 31,8 teńgeden 26,2 teńgege (17,5 protsentke) túsedi. Al qalanyń ózinde gaz 3,5 teńgege (12 protsent) arzandaıdy. Budan bólek, Mańǵystaý oblysynda - 0,3 teńgege (3,3 protsentke), Jambyl oblysynda - 1,5 teńgege (6 protsentke), al Shymkent pen Túrkistan qalalarynda bir tekshe metr gazdyń quny 1,8 teńgege (6 protsentke) tómendeıdi. Osynyń arqasynda tutynýshylar 5 mlrd teńgeni únemdep otyrady.

«Atyraý men Qyzylorda oblystarynda gazdyń baǵasy arzandamaıdy. Atalǵan óńirlerde gazdyń baǵasy sol kúıinde qalady. Qazirgi kezde Atyraý oblysynda gazdyń tarıfi eń tómen bolyp sanalady. Al Qyzylorda oblysynda gazdandyrý boıynsha barlyq ınvestıtsııalyq baǵdarlama oryndaldy. Sondyqtan tarıfti tómendetýge rezerv joq», - dedi S.Jumanǵarın Úkimet úıinde ótken baspasóz máslıxatynda.  

Onyń aıtýynsha, kelesi jyly jylý tarıfterin tómendetýdiń nátıjesinde respýblıka boıynsha 6 mlrd teńge únemdeledi. Budan bólek, sýdy burý men sýmen jabdyqtaý salasynda 2 mlrd teńge, al elektrenergııa boıynsha 14 mlrd teńge únemdeýge múmkindik bolady. Jalpy, gazben birge tutynýshylar 27,5 mlrd teńgeni únemdeı alady.

Aıta keteıik, búgin QR Ulttyq ekonomıka mınıstrligi kommýnaldyq tarıfterdiń tómendeýine qatysty naqty esepti jarııalady. Osy oraıdaǵ vıtse-mınıstr S.Jumanǵarın eki bólmeli páter úshin kommýnaldyq tarıfterdiń qalaısha ózgeretinin mysalmen kórsetti.