Eki apta ishinde barlyq nysanǵa jylý beriledi - «Astana-Teplotranzıt»

ASTANA. QazAqparat – Elordada «Astana – Teplotranzıt» mekemesiniń jáne jylý qazandyqtarynyń qys mezgiline daıyndyǵy pysyqtaldy, dep habarlaıdy QazAqparat tilshisi.

Astanada jylý berý maýsymyna daıyndyq barysy tekserildi

Búgin elordada qoǵamdyq keńes músheleri qaladaǵy jylý berýge jaýapty mekemelerdiń qysqa daıyndyǵy barysyn baqylady.

Reıd barysynda Jeleznodorojnyı turǵyn úı alabyndaǵy avtonomdy jylý qazandyǵy, «Astana-Teplotranzıt» AQ jáne Baıqońyr aýdanynda ornalasqan 2-shi jylý elektr ortalyǵynyń (JEO-2) jumysy barysy tekserildi.

«Bizdiń uıymǵa qarasty 55 magıstraldi jylý jelisi bar. Olardyń bári synaqtan ótti, qys mezgiline daıyn. Bıyl jylý berý maýsymyna daıyndyq barysynda qala boıynsha 15 shaqyrym jylý berý júıesi jóndeýden ótti. Osylaısha bizdiń mekeme qysqa 99 paıyz daıyn. Jylý berý nysandary birneshe sanatqa bólinedi. ıAǵnı áleýmettik nysandar, turǵyn úıler jáne mekemeler. Qala ákimdiginiń sheshimine sáıkes búgin elorda boıynsha 200-den astam nysanǵa jylý berildi», - dedi «Astana-Teplotranzıt» AQ basqarma tóraǵasynyń orynbasary, bas ınjener Abzal Saýǵabaev.

Onyń aıtýynsha, jylý berý protsesi kezeń boıynsha júrgiziledi. Jylý aldymen áleýmettik nysandarǵa beriledi. Onyń qatarynda balabaqsha, mektep, aýrýhana bar.

«Úshinshi kezekte óndiris nysandaryna jylý beriledi. Elordada aýa raıynyń aıaq astynan sýyp ketýine baılanysty áleýmettik nysandarǵa jylý 26 qyrkúıekte berile bastady. Búgin ishinara turǵyn úıler qosyldy. Jalpy 1,5-2 aptanyń ishinde qala boıynsha barlyq nysanǵa jylý beriledi. Bekitilgen erejege sáıkes eger aýa raıy 10 gradýstan tómen bolsa onda jylytý ýaqytynan buryn bastalady. Qazir Astanada aýa raıy -10 gradýs, sondyqtan jylý berilip jatyr», - deıdi ol.

«Astana-Teplotranzıt» AQ ókili keltirgen málimet boıynsha elordada ortalyqtandyrylǵan jylýǵa qosylatyn 3 myńnan astam turǵyn úı bar.

«Búginde elordany gazben qamtý qarqyndy júrip jatyr. Qazir qala mańyndaǵy 10 turǵyn úı alabyna kógildir otyn berilýde. Sońǵy málimetke sáıkes 6 myńǵa jýyq jeke turǵyn úı gazǵa qosyldy. Sonymen qatar bıyl qaladaǵy JEO-2 tolyqtaı gazǵa kóshirildi. Al JEO-1 boıynsha 10 qazandyq kógildir otynǵa aýystyryldy. Jylý maýsymyna daıyndyq bıyl sáýirden bastaldy. ıAǵnı jylý berý qalaı aıaqtaldy, sol sátte kelesi maýsymǵa daıyndyqty bastap kettik», - dedi Astana qalasynyń ákimdigi otyn-energetıka resýrstar bóliminiń basshysy Maqsat Esmaǵulov.