Ekibastuzda memlekettik qyzmetshiler qumar oıyndaryn oınaǵan

ASTANA. KAZINFORM – Ekibastuzda memlekettik qyzmetshiler qumar oıyndarǵa qatysqany úshin áshkerelendi. 

Qala prokýratýrasy ákimdik memlekettik qyzmetshileriniń qyzmettik ádep normalaryn buzý faktilerin anyqtady.

Atap aıtqanda, laýazymdy tulǵalar zańnamalyq tyıymǵa qaramastan býkmekerlik keńselerde belsendi shottarǵa ıe bolǵan.

— TKSh, jolaýshylar kóligi jáne avtomobıl joldary bóliminiń sektor meńgerýshisiniń jeke shoty boıynsha aınalym 6,8 mln teńge bolǵan.

Uqsas zań buzýshylyqtar aýyldyq okrýg ákimi, Turǵyn úı ınspektsııasy bóliminiń basshysynyń orynbasary, sondaı-aq qala ákimdiginiń qurylymdyq bólimsheleriniń jeti qyzmetkeri tarapynan da anyqtaldy, — delingen prokýratýra habarlamasynda.

Qyzmettik tekserý nátıjeleri boıynsha barlyq quqyqbuzýshylyq faktileri jónindegi materıaldar Pavlodar oblysy boıynsha Memlekettik qyzmet isteri departamentiniń Ádep jónindegi keńesine joldandy.

Memlekettik qyzmetshiler tarapynan ádep normalary men minez-qulyq qaǵıdalaryn saqtaýǵa baqylaýdy álsiz júrgizgeni úshin qala ákimi apparatynyń jaýapty basshysy tártiptik jaýapkershilikke tartyldy. 

Aıta ketelik Aqtóbede qumar oıynǵa salynǵan áskerı qyzmetshi jumysynan aıyrylǵan edi.