Eki qazaqstandyq quldyqtan bosatyldy
Іshki ister mınıstrligi Uıymdasqan qylmysqa qarsy kúres departamentiniń bastyǵy Qanat Nurmaǵambetov Abaı jáne Pavlodar óńirlerinde adamdy quldyqqa jegý faktileri tirkelgenin málim etti, dep habarlaıdy Kazinform.
«Abaı oblysynda polıtsııaǵa 1973 jyly týǵan, psıhıkalyq aýytqýy bar aǵasynyń iz-túzsiz joǵalyp ketkeni týraly aryz tústi. Sol málimetti tekserý kezinde Uıymdasqan qylmysqa qarsy kúres basqarmasynyń qyzmetkerleri eki adamdy ustady. Olar jábirlenýshiniń baılanys quralyn tartyp alyp, ózin aldap-sýlap Semeıden alyp shyqqan. Qaladan 200 shaqyrym jerdegi sharýa qojalyqta eńbekke salǵan.
Er adamdy ol jerde 3 apta boıy erkinen tys ustaǵan jáne úı sharýasyna jekken. Bul derek Sotqa deıingi tergep-tekserýlerdiń biryńǵaı tizilimine Qylmystyq kodekstiń 128-baby boıynsha tirkeldi. Zardap shekken adam týysqandaryna qaıtaryldy», - dedi departament bastyǵy.
Spıkerdiń sózinshe, Uıymdasqan qylmysqa qarsy kúres basqarmasynyń mamandary Pavlodar oblysynda da eńbekke májbúrlep tartýdyń jolyn kesken.
«1987 jyly týǵan er adamdy kúsh qoldanamyz dep qorqytyp, jaqyndaǵy eldi mekennen 60 shaqyrym jerdegi ańshy úıine alyp ketken. Onyń moınyna qaryz ilip, eki jyl boıy eńbegin qanaǵan. Qazir eńbegin qanaý maqsatymen adamdy bas bostandyǵynan zańsyz aıyrý faktisi boıynsha tergeý júrip jatyr. Zardap shegýshi týystaryna qaıtaryldy», - dedi Qanat Nurmaǵambetov.
