Eki aptanyń ishinde polıtsııa 117 qylmyskerdi ustady – ІІM
ASTANA. KAZINFORM — Eki apta ishinde ІІM jedel bólinisteri izdeýde júrgen 117 qylmyskerdi ustap, habar-osharsyz ketken 98 adamnyń ornalasqan jerin anyqtady. Bul týraly Polisia.kz. jazdy.
Jedel-izdestirý is-sharalaryn júrgizý kezinde Aqmola oblysynyń Zerendi kentiniń mańyndaǵy orman alqabynda tirkelmegen myltyqpen jergilikti turǵyndy atyp óltirgen er adam ustaldy.
Tarazda 18 jastaǵy aýyl turǵyny quryqtaldy. Ol toptyq tóbeles kezinde basqa fıgýranttyń aıaǵyna atqan.
Qyzylordada bóten úıge kirip, ondaǵy eki turǵyndy uryp-soǵyp, pyshaqpen jaraqattap, altyn syrǵa men uıaly telefon urlap ketken er adam ustaldy. Kúdikti buryn sotty bolǵan.
Jetisý oblysynda da qylmysker quryqtaldy. Ol Almaty oblysyndaǵy kásiporyndardyń biriniń aýmaǵyna kirip, kúzetshini uryp-soǵyp, ony tapanshaǵa uqsas zatpen qorqytyp, 62 mln teńge kóleminde aqshany ıemdengen.
– Bul baǵyttaǵy jumys jalǵasyp jatyr, – dedi vedomstvoda.
