EAEO: júk áýe kemelerine 12 jyldyq bajsyz rejım engizildi
ASTANA. KAZINFORM — Máskeýdegi Eýrazııalyq ekonomıkalyq komıssııa Keńesiniń otyrysynda EAEO elderiniń ekonomıkalyq qyzmetiniń negizgi baǵyttaryna qatysty birqatar másele qaraldy, dep habarlaıdy Úkimettiń baspasóz qyzmeti.
Qazaqstandyq delegatsııany Premer-mınıstrdiń orynbasary — ulttyq ekonomıka mınıstri Serik Jumanǵarın basqardy.
Qazaqstandyq taraptyń bastamasy boıynsha «Azamattyq qorǵanysqa jáne tabıǵı jáne tehnogendik sıpattaǵy tótenshe jaǵdaılardan qorǵaýǵa arnalǵan ónimniń qaýipsizdigi týraly» tehnıkalyq reglamentti qoldaný jónindegi ótpeli erejelerdi uzartý máselesi talqylandy.
— Qazaqstan EEK Keńesinde tranzıttik mýltımodaldyq habty damytý sheńberinde júk áýe kemelerin kedendik bajdan jáne salyqtan bosatý máselesin kóterdi. Usynysqa qoldaý jasalyp, endi bajsyz rejım 12 jyl boıy qoldanylady. Bul qazaqstandyq avıatasymaldaýshylarǵa júk flotyn jańartý jáne paıdalaný kezinde qarjylyq júktemeni azaıtýǵa múmkindik berip (ETT EAEO kedendik ákelý bajynyń qoldanystaǵy stavkasy ushaqqa qatysty 7,5% jáne 12,5%), tehnıka alýǵa jeńildikpen qatty kelisimshart jasaýǵa múmkindik beredi. Júk áýe parkiniń boljamdy suranysy — 130 áýe kemesi, — delingen habarlamada.
EEK Keńesi sondaı-aq EAEO keıbir elderi, onyń ishinde Qazaqstan úshin de jaryqdıodty modýlder ákelýdi ımporttyq bajdan bosatýdy maquldady. Shara EAEO ishindegi ónerkásiptik kooperatsııany yntalandyrýǵa jáne jaryq dıodty shamdy óndirý kezinde ımporttyq jıyntyqtaýyshty paıdalanýdyń ashyqtyǵyn arttyrýǵa baǵyttalǵan.
Qurylys materıaldaryn (gıps, tsement, eritindiler jáne t. b.), boıaý ónimin, balalarǵa arnalǵan keıbir oıynshyqtar men oıyndardy (skýterler, pedaldy avtomobılder, qýyrshaq arbalary, qýyrshaqtar, elektr jarys avtomobıli jıyntyǵy, ústel oıyndary jáne t. b.), erıtin jáne qaınatylatyn sýsyndardy (shaı, kofe, kakao jáne t. b.) mindetti túrde tańbalaý týraly sheshim qabyldandy.
Eske salsaq, árbir memleket bıznespen talqylaýdan jáne ınfraqurylymnyń daıyndyǵyn taldaýdan keıin ǵana ony engizý merzimi men tetigi týraly sheshimdi derbes qabyldaıdy.
Budan basqa, memlekettik satyp alý maqsaty úshin Taýardyń shyǵarylǵan elin aıqyndaý qaǵıdasyna ózgeris engizildi. Ózgeristiń negizgi maqsaty — múshe memleketter óndirýshileriniń EAEO sheńberinde memlekettik satyp alý naryǵyna kedergisiz qol jetkizýi.
Atap aıtqanda, talshyqty-optıkalyq kabel óndirisine qoıylatyn talaptar belgilenip, sondaı-aq ST-1 sertıfıkaty arqyly qatysý úshin taýar tizbesi tolyqtyryldy. Sondaı-aq ST-1 sertıfıkatymen shyǵarylǵanyn rastaıtyn taýar tizimi keńeıtildi. Oǵan sıntetıkalyq talshyqtan jasalǵan arqan jáne arqan buıymdary, sondaı-aq medıtsınalyq emes rentgendik tekserý qondyrǵylary jáne buzbaıtyn baqylaý júıeleri kiredi.
Qabyldanǵan sheshimder atalǵan taýar óndirýshilerge óz ónimin ónerkásiptik ónimniń Eýrazııalyq tizilimine engizýge jáne Odaq elderiniń naryǵyna qol jetkizýin arttyrýǵa múmkindik beredi.
Jalpy energetıka, tabıǵı monopolıny retteý, qarjy naryǵy, memlekettik satyp alý, kedendik retteý, kedendik-tarıftik retteý, tehnıkalyq retteý salasyndaǵy ıntegratsııalyq úderisterdi damytýǵa arnalǵan máseleler qaraldy.
Budan buryn Serik Jumanǵarın bıyl ekonomıkalyq ósim 5-5,5% deńgeıinde qalyptasýy múmkin ekenin aıtty.
