EAEO elderi ǵylymı ataqtardy ózara taný týraly kelisimdi maquldady
ASTANA. KAZINFORM – Onlaın formatta Eýrazııalyq ekonomıkalyq komıssııa Keńesiniń kezekti otyrysy ótti. Bul týraly Úkimettiń baspasóz qyzmeti habarlady.
Qatysýshylar EAEO-ǵa múshe memleketterde ǵylymı ataqtar týraly qujattardy ózara taný jónindegi kelisimdi maquldady. Qujat eńbek kóshi-qony kezinde ǵylymı ataqtardy tikeleı tanýdy kózdeıdi, bul olardyń ıelerine Odaqtyń basqa elderinde berilgen biliktiligine sáıkes jumys isteýge múmkindik beredi.
Jumysqa ornalasatyn memlekette saraptama nátıjesi boıynsha teris sheshim qabyldanbaǵan bolsa kelisim kúshine engenge deıin berilgen qujattar da resmı moıyndalady. Endi Kelisim ratıfıkatsııalaý úshin EAEO elderine joldanady, sodan keıin qujat kúshine enedi.
Sondaı-aq EEK Keńesinde EAEO-ǵa múshe memleketterdiń zııatkerlik kólik júıeleriniń ózara is-qımylyn jetildirý tujyrymdamasyn júzege asyrý jónindegi jol kartasy bekitildi. Bıyl aqparattyq ózara is-qımyldyń bazalyq servısterin aıqyndaý, derekter almasý formaty boıynsha usynystar ázirleý jáne tıisti quqyqtyq bazany qalyptastyrý josparlanyp otyr.
Otyrys qorytyndysy boıynsha EAEO kedendik aýmaǵynda veterınarııalyq dárilik zattardyń aınalysyn retteý qaǵıdalarynyń jekelegen erejelerin, sondaı-aq tehnıkalyq reglamentterdi ázirleý josparyn ózektendirý týraly sheshim qabyldandy.
Eske salsaq, bıyl EEK Keńesine Qazaqstan tóraǵalyq etedi, ony Premer-mınıstrdiń orynbasary – ulttyq ekonomıka mınıstri Serik Jumanǵarın basqarady.
Aıta ketelik Máskeýde ótken Eýrazııalyq ekonomıkalyq komıssııa keńesi otyrysynda EAEO-ǵa múshe memleketterdiń ekonomıkasy úshin birqatar mańyzdy sheshim qabyldanǵan edi.