Djeı Lonyń Almatydaǵy kontserti qalaı ótti
ALMATY. KAZINFORM — Álemdik pop-juldyz Djennıfer Lopes Almatynyń Ortalyq stadıonynda jeke kontsert berdi.
Mýzykalyq keshke 20 myńnan astam adam, onyń ishinde qazaqstandyqtardan bólek AQSh, Japonııa, BAÁ, Kanada, Ońtústik Koreıa syndy 35-ten asa elden 8 myń kórermen qatysty. Djeı Lo jankúıerleriniń aldynda 2 saǵattan astam ýaqyt óner kórsetti. Amerıkalyq juldyzdyń án shashýy men jalyndy bıi jınalǵan adamdarǵa jaqsy kóńil-kúı syılady.
Kontserttegi qyzyqty sátterdiń biri — Djennıfer Lopes jas ata-analarǵa sábıdiń jynysyn anyqtaýǵa kómektesýi boldy. Juldyz sahna ústinen ótinish bildirgen jupqa qyz dúnıege keletinin habarlady.
Almatydaǵy kontsert — Djeı Lonyń «Up All Night» dep atalǵan týrynyń 19-shy jáne sońǵy kontserti boldy.
Kontsert aıaqtalǵan soń eriktiler «Taza Qazaqstan» ekologııalyq naýqany aıasynda stadıonnyń ishi-syrtyn tazalady.
Jalpy kontsert kezinde qoǵamdyq qaýipsizdikti 2960 qyzmetker qamtamasyz etti. Onyń ishinde 2240 polıtsııa qyzmetkeri, 600 áskerı qyzmetker, 120 jeke kúzet agenttigi ókilderi jáne 300 erikti bar.
Kontsertke kelgen adamdardyń yńǵaılylyǵy úshin Ortalyq stadıonǵa deıin jáne keri baǵytta tegin avtobýstar uıymdastyryldy. 50-den astam shattl avtobýs birneshe baǵytta qatynady.
Eske salaıyq, buǵan deıin álemdik pop-juldyz 1 tamyz kúni «Astana Arena» stadıonynda jeke kontsert berdi.