Dýshanbede Qazaqstan kınosy kúnderi bastaldy
ASTANA. KAZINFORM – Tájikstan astanasynda Qazaqstan kınosy kúnderi bastaldy. Baǵdarlamaǵa sońǵy jyldary otandyq rejısserler túsirgen eń úzdik týyndylar endi.
Іs-sharanyń ashylý saltanatynda Qazaqstannyń Tájikstandaǵy elshisi Ýálıhan Tórehanov sóz sóılep, eki eldi tek strategııalyq áriptestik qana emes, sonymen birge rýhanı qundylyqtar men ǵasyrlar boıy qalyptasqan dostyq, ózara túsinistik jáne qurmet baılanystyratynyn atap ótti.
Onyń aıtýynsha, mádenıet, ásirese kıno óneri, halyqtar arasyndaǵy dıalogty tereńdetýde mańyzdy ról atqarady.
– Búgin biz Tájikstan kórermenderine zamanaýı qazaqstandyq fılmderdi usynyp otyrmyz. Bul týyndylar daryndy rejısserler men akterlerdiń eńbegimen jasalyp, halqymyzdyń baı mádenıetin, tarıhyn, rýhyn jáne búgingi ómirin kórkem beıneleıdi, – dedi qazaqstandyq dıplomat.
«Tájikfılm» kınostýdııasynyń dırektory Mahmadsaıd Shohıenov óz sózinde qazaqstandyq kınematograf árdaıym joǵary kásibıligimen, tereń mazmunymen jáne shynaıylyǵymen erekshelenetinin jetkizdi.
– Qazaqstan rejısserleriniń fılmderi halyqaralyq festıvalderde júldege ıe bolyp qana qoımaı, Tájikstan halqynyń júreginen de oryn tabýda, – dep atap ótti ol.
Kıno kúnderiniń ashylý fılmi retinde rejısser Serikbol Ótepbergenovtiń «Patrıottar ýaqyty» kartınasy kórsetildi.
– Bizdiń fılmdi tájik kórermenine usynǵanymyzǵa qýanyshtymyz. Týyndyda erlik pen batyldyq, Otanǵa adaldyq, otbasy qundylyqtary men mahabbat jaıly baıandalady, – dedi Kazinform tilshisine bergen suhbatynda basty áıel rólin somdaǵan Zarına Hadjımetova.
Kórermender sondaı-aq qazaq balýany Qajymuqan Muńaıtpasov týraly túsirilgen «Balýan. Qajymuqan – álem chempıony» bıografııalyq fılmi men qazaq án óneriniń sańlaǵy Ámire Qashaýbaevtyń ómiri men shyǵarmashylyǵyna arnalǵan «Ámire» kartınasyn tamashalaı alady.
Aıta keteıik, Tájikstanda qazaqtyń uly aqyndary, oıshyldary men ǵalymdarynyń kitaptary tanystyryldy.