Dýshanbede akademık Qanysh Sátbaevty eske aldy
ASTANA. KAZINFORM — Qazaqtyń kórnekti ǵalymy Qanysh Sátbaevtyń 127 jyldyq mereıtoıy qarsańynda Dýshanbede ony eske alý rásimi ótti, dep habarlaıdy Kazinform agenttiginiń Tájikstandaǵy menshikti tilshisi.
Geologııa, seısmologııalyq qurylys jáne seısmologııa ınstıtýtynda Tájikstan Ulttyq ǵylym akademııasynyń tuńǵysh qurmetti akademıgi Qanysh Sátbaevtyń eskertkish taqtasyna gúl shoqtaryn qoıý rásimi ótti.
TR Ulttyq ǵylym akademııasynyń vıtse-prezıdenti Ilhom Amonzoda quttyqtaý sózinde Qanysh Sátbaevtyń esimi álemdik ǵylym tarıhynda, ásirese Ortalyq Azııa aımaǵynda erekshe oryn alatynyn atap ótti.
— Onyń esimi tek bizdiń ǵylymı muramyzdy ǵana emes, sonymen qatar búginde halyqtarymyz arasynda belsendi damyp otyrǵan berik tarıhı baılanysty da bildiredi. Búginde biz uly ǵalymǵa qurmet kórsetip qana qoımaı, sonymen qatar ǵylymdy damytýǵa degen adaldyǵymyzdy taǵy da rastaımyz. Qanysh Sátbaevtyń ómiri men eńbeginiń úlgisi bizdi jańa ǵylymı jetistikterge shabyttandyrady, ǵylymı mektepterimizdiń damýyna úles qosady jáne dostyǵymyz nyǵaıtady, — dedi I. Amonzoda.
Qazaqstan elshisi Ýálıhan Tórehanov Ulttyq ǵylym akademııasy men ınstıtýt basshylyǵyna Qanysh Sátbaevtyń esimin tájik jerinde eske alýǵa múmkindik bergen is-sharany uıymdastyrýǵa kómekteskeni úshin alǵys bildirdi.
Dıplomat onyń ǵylymı jáne praktıkalyq qyzmeti keńdigi men alýan túrliligimen erekshelenip, Tájikstannyń negizgi ǵylymı jáne akademııalyq mekemesiniń damýyna aıtarlyqtaı úles qosqanyn atap ótti.
— Geologııalyq jáne mıneralogııalyq ǵylymdar salasyndaǵy kórnekti ǵalym retinde Qanysh Imantaıuly Tájikstan Ǵylym akademııasyn qurý aıasynda taǵy bir ınstıtýt — Tájik seısmologııa ınstıtýtyn qurýdy usyndy. Ol respýblıkanyń joǵary seısmıkalyq aımaqta ornalasqanyn jáne seısmologııalyq zertteýlerdiń iri ónerkásiptik kásiporyndar, áleýmettik jáne qoǵamdyq nysandar, turǵyn úılerdi salýdyń uzaq merzimdi máselelerin sheshýde mańyzdy ról atqaratynyn moıyndady, — dep atap ótti Ý. Tórehanov.
Osyǵan deıin Tájikstanda qazaqstandyq bitimgerlerdi eske alý rásimi ótkenin jazdyq.