Dýbaıda Ilon Masktyń kompanııasy jobalaǵan jerasty týnnelderi salynady

ASTANA. KAZINFORM – Dýbaıdyń Joldar jáne kólik basqarmasy Ilon Mask negizin qalaǵan týnnelder jáne ınfraqurylym qurylys kompanııasy The Boring Company-men strategııalyq yntymaqtastyq týraly kelisimge qol qoıdy, dep habarlaıdy Kazinform tilshisi.

Bul kelisim Dubai Loop jerasty jolaýshylar tasymaly júıesiniń birinshi kezeńiniń bastalýyn belgiledi.

Jobanyń birinshi kezeńi – tórt stantsııasy bar 6,4 shaqyrym Dýbaı halyqaralyq qarjy ortalyǵy (DIFC) men The Dubai Mall saýda ortalyǵyn baılanystyrady. Keıinnen joba 22,2 shaqyrymǵa (19 stantsııa) deıin keńeıtilip, Dýbaı Dúnıejúzilik saýda ortalyǵy men qarjy aýdanyn Business Bay aýdanymen baılanystyrady.

Dýbaıdyń murager hanzadasy bir jyldan az ýaqyt buryn jarııalaǵan Dubai Loop jobasy – árqaısysynyń dıametri 3,6 metr bolatyn jerasty týnnelderiniń jelisi, ol jolaýshylardy avtomobılmen tasymaldaýǵa arnalǵan jáne halyq tyǵyz qonystanǵan aýdandarda kólik júıesiniń tıimdiligin arttyrýǵa baǵyttalǵan.

Dýbaı medıakeńsesiniń málimetinshe, joba pılottyq kezeńinde kúnine 13 myńǵa deıin jolaýshyǵa qyzmet kórsetedi dep shamalanyp otyr. Qurylys merzimi úsh jylǵa eseptelgen tolyq joba kúnine 30 myń jolaýshyǵa deıin qyzmet kórsete alady.

The Boring Company – jolaýshylar tasymalyna arnalǵan týnnelder qurylysshysy. Onyń jobalarynyń arasynda qazirgi ýaqytta salynyp jatqan Vegas Loop jáne Tesla kólikterimen jolaýshylardy tasymaldaýǵa arnalǵan Las-Vegastaǵy týnnelder jelisi – aıaqtalǵan LVCC Loop bar.

Buǵan deıin Dýbaıda altynnan kóshe salynatynyn habarlaǵan bolatynbyz.