Dýbaıda 2 jyldan keıin áýe taksıleri iske qosylady
ASTANA. KAZINFORM – 2026 jyldyń birinshi toqsanynda Dýbaıda áýe taksıleri jumys isteı bastaıdy. Bul týraly Dýbaı kólik jáne jol basqarmasynyń kóliktik tehnologııalar departamentiniń dırektory Halıd ál-Avadı habarlady, dep jazady RIA Novostı.
– Biz áýe taksı qyzmetin 2026 jyldyń birinshi toqsanynda iske qosýdy josparlap otyrmyz. Qazir biz AQSh-tyń Joby Aviation kompanııasymen kólikti synaý jáne sertıfıkattaý boıynsha jumys istep jatyrmyz. Biz sondaı-aq «vertıporttardy» damytatyn brıtandyq Skyports kompanııasymen stantsııa jobasyn bastaımyz, – deıdi ol.
Halıd ál-Avadıdiń aıtýynsha, Dýbaıda tórt taksı áýejaıyn salý josparda bar. Onyń ekeýi 2026 jyldyń basynda iske qosylady. Infraqurylymdyq nysandardan basqa, áýe taksıleriniń monıtorıngi men kúzet qyzmeti de qurylady.
– Biz seriktesterimizben osy qyzmetti barynsha yńǵaıly etý úshin jumys istep jatyrmyz. Bul kádimgi tikushaqtardy paıdalanýdan áldeqaıda arzan bolady dep oılaımyz. Bul lımýzındi jalǵa alýdan da arzanyraq bolady nemese sonyń baǵasymen teń bolady, – deıdi Avadı.
Ol elektr qozǵaltqyshtary bar áýe taksıleri ádettegi tikushaqtarǵa qaraǵanda 100 ese az shý shyǵaratynyn atap ótti. Al General Motors kompanııasymen birlesip jasalyp jatqan júrgizýshisiz taksıler 2025 jyly jumysyn bastaıdy. Qazir olar synaqtan ótip jatyr.
– Biz 2026 jylǵa qaraı gıbrıdti jáne elektr qozǵaltqyshtary arqyly lımýzın qyzmetin tolyǵymen ekologııalyq taza etýdi josparlap otyrmyz. Josparlarǵa sáıkes, 2035 jylǵa qaraı Dýbaıdaǵy barlyq taksıler, al 2050 jylǵa qaraı búkil avtobýs parki tek elektr qozǵaltqyshtary bar avtobýstardan turady, – deıdi Avadı.
