Dýbaı áýejaıynda álemdegi alǵashqy JI-dálizi ashyldy
ASTANA. KAZINFORM — Dýbaı halyqaralyq áýejaıy (DXB) álemdegi alǵashqy jasandy ıntellekt (JI) tehnologııasyna negizdelgen dálizdi iske qosty, dep jazady AZERTADJ.
Bul júıe jolaýshylarǵa qujat kórsetpeı jáne toqtamaı-aq ımmıgratsııalyq baqylaýdan ótýge múmkindik beredi.
Jasandy ıntellekt júıesi bir ýaqytta on adamǵa deıin qyzmet kórsetip, jolaýshylardy baqylaý pýnktterine jetpeı turyp-aq tanıdy, dep málimdedi Dýbaıdyń bas rezıdentýra jáne sheteldikter isteri jónindegi bas basqarmasynyń (GDRFA) bas dırektory, general-leıtenant Muhammed Ahmed Ál Marrı.
Jańa jasandy ıntellekt dálizi rásimderdi jyldamdatý arqyly áýejaıdyń ótkizý qabiletin eki esege arttyrady. Sondaı-aq, júıe zań buzýshylyqtardy anyqtap, kúdikti pasporttardy tıisti bólimniń sarapshylaryna tikeleı baǵyttaıdy.
Dýbaı áýejaıy 2024 jyly halyqaralyq jolaýshylar aǵyny boıynsha álemdegi eń jolaýshy kóp qabyldaıtyn áýejaı mártebesin saqtap qaldy. Jetildirilgen tehnologııalardyń engizilýi kútý ýaqytyn qysqartyp, jurttyń kóp jınalýyn boldyrmaı, barlyq jolaýshylar úshin protsedýralardy yńǵaıly jáne jyldam ótkizýge múmkindik beredi.
Osyǵan deıin Dýbaıda álemdegi eń bıik metro stantsııasy salynatyny habarlanǵan edi.