Dropperlerdiń shottary qalaı buǵattalady
ASTANA. KAZINFORM – Qarjy naryǵyn retteý jáne damytý agenttiginiń tóraǵasy Mádına Ábilqasymova elimizde tólem kartalaryna qatysty talaptar kúsheıtilgenin aıtty.
- Tólem kartalaryna toqtalsaq, Ulttyq bankpen birlese bul salada talaptardy kúsheıtý sharalary qabyldandy. Sebebi kartalardy dropperlerdiń paıdalaný oqıǵalary jıilep ketti. Osy rette, alaıaqtyqtyq jolmen alynǵan qarajatty qolma-qol aqshaǵa aýystyrýǵa, sondaı-aq esirtki saýdasynan túsken qarjyny aınaldyrýǵa qatysty qylmystar anyqtalyp jatyr. Sondyqtan esirtki trafıgimen jáne alaıaqtyqpen kúres baǵytynda kartalar boıynsha talaptardy kúsheıttik, - M.Ábilqasymova.
Onyń aıtýynsha, bir adamda naqty bir bankte 10 kartadan artyq rásimdeı almaıtyndaı shekteý engizildi.
- Bir adamǵa 200-den astam karta rásimdelgen oqıǵalar boldy jáne ony dropperler paıdalandy. Ekinshiden, dropperler boıynsha bizde «sur» jáne «qara» tizim quryldy. Bul turǵyda birneshe myń adam osy tizimge engizildi. Olarǵa qatysty shottarmen qatar, barlyq operatsııa buǵattalyp, tekseriledi, - dedi agenttik basshysy.
Eske salsaq, bıyl jazda elimizde 6 myńnan astam dropper týraly málimet anyqtalǵanyn jazǵan edik.