Dımash Qudaıbergen Brıtanııanyń «The Upcoming» jýrnalyna suhbat berdi

ASTANA. KAZINFORM — Álemge áıgili qazaq ánshisi, kompozıtor ári mýltıınstrýmentalıst Dımash Qudaıbergen Londondaǵy jeke kontserti qarsańynda Ulybrıtanııanyń mádenı basylymy «The Upcoming» jýrnalyna suhbat berdi. Ánshi óz shyǵarmashylyǵyndaǵy mádenıetter toǵysy, jańa jobalary jáne halyqaralyq sahnadaǵy tájirıbesi týraly aıtty.

Dımashtyń pikirinshe, mýzyka – til men mádenıet shekarasyn joıatyn ámbebap qural. Ol ár tyńdarman óz júregine jaqyn áýen taba alatyn kontserttik baǵdarlamalar jasaýǵa tyrysatynyn atap ótti. Ártis úshin janrlyq shekteý joq: onyń shyǵarmashylyǵynda opera, pop, rok, folklor jáne zamanaýı baǵyttar toǵysady.

– Men óz ónerimdi belgili bir qalypqa syıǵyzýǵa tyryspaımyn. Kerisinshe, túrli janr men mádenıetti biriktirip, halyqtardyń rýhanı baılanysyn kórsetýge umtylamyn, – dedi ánshi.

Dımash 12 qarashada Londonnyń áıgili OVO Arena Wembley sahnasynda ótetin jeke kontsertine daıyndalyp jatqanyn aıtty. Ol bul kontsertti óziniń shyǵarmashylyq jolyndaǵy jańa beles dep sanaıdy.

Ánshi suhbatta til men mádenı aıyrmashylyqtarǵa qaramastan, kórermenmen baılanys ornatý ońaı ekenin de atap ótti:

– Mýzyka – bárimizdiń ortaq tilimiz. Án shyrqaı bastaǵan sátten-aq barlyq kedergiler joıylady, – deıdi Dımash.

Sondaı-aq ol 2026 jyly jaryq kóretin «Voice Beyond Horizon» atty alǵashqy prodıýserlik jobasy týraly aıtty. Qytaıdyń Hunan Broadcasting System telearnasymen birlesip júzege asyrylyp jatqan bul joba halyqaralyq ártisterge Qazaqstan mádenıetin óz kókjıegi arqyly tanytýǵa múmkindik beredi.

– Meniń maqsatym – kórermenniń júregine týǵan elimniń sulýlyǵyn jetkizý, – dep túıindedi ol.

Eske sala keteıik, buǵan deıin Dımash Qudaıbergen CNN telearnasyna suhbat bergenin jazǵan bolatynbyz.