Dımash Qudaıbergen CNN telearnasyna suhbat berdi
ASTANA. KAZINFORM — 10 qarasha kúni Londonǵa barǵan boıda ánshi Dımash Qudaıbergen álemge tanymal CNN telearnasynyń stýdııasyna shaqyryldy. Ánshi «What We Know with Max Foster» atty halyqaralyq jańalyqtar baǵdarlamasynda tikeleı efırde qonaq bolyp, shyǵarmashylyq joly men basty mıssııasy jaıly áńgimeledi.
Baǵdarlama júrgizýshisi Maks Foster Dımashty «álem boıynsha orasan zor tyńdarmany bar qazaqstandyq ánshi» dep tanystyryp, onyń segiz jyl buryn Qytaıda biregeı stıli men alty oktavalyq daýysymen tanylǵanyn atap ótti. Sondaı-aq júrgizýshi ánshiniń 16 tilde án oryndaıtynyn jáne jýyrda Nıý-Iorktegi Madison Square Garden sahnasynda kontsert ótkizgenin eske saldy.
Suhbat barysynda Dımash Qudaıbergen kásibı jolynyń bastaýyn eske alyp, vokaldyq sheberliginiń qalyptasýy týraly aıtty:
– Halyqaralyq mansabym shamamen 15 jyl buryn bastaldy. Aldymen operalyq vokaldy meńgerip, keıin pop jáne djaz baǵytynda damydym. Qazir de únemi bilimimdi jetildirip otyramyn, – dedi ol.
Ánshi ne sebepti opera teatrynyń usynysynan bas tartyp, zamanaýı mýzykany tańdaǵanyn da túsindirdi:
– Meniń daýys tabıǵatyma neoklassıkalyq baǵyt kóbirek sáıkes keledi. Degenmen keıde tájirıbe jasap, kontsertterde rok nemese rep elementterin qosamyn, – dedi Dımash.
Sondaı-aq ol daýys dıapazonynyń keńeıýi men kásibı eńbegi týraly aıtyp, ustazy Marat Aıtımovqa alǵys bildirdi.
– Bul – Jaratýshynyń syıy, biraq eń bastysy – eńbek. Men kún saıyn vokaldyq jattyǵý jasaımyn. Pavarottı aıtqandaı, elý jyl sahnada bolǵan soń ǵana «qalaı án aıtý kerek ekenin túsinesiń» degen sózimen tolyq kelisemin, – dedi ánshi.
Suhbat sońynda Dımash óziniń basty mıssııasyn – Qazaqstannyń mádenıetin álemge tanytý dep atap ótti:
– Men úshin eń úlken maqtanysh – elimniń mádenıeti men tarıhyn, dástúrin, beıbitshilik pen súıispenshilik qundylyqtaryn álemge jetkizý. Sondyqtan aıtarym – Qazaqstanǵa qosh keldińizder, – dedi ol.
Eske sala keteıik, buǵan deıin Vetnamdaǵy buqaralyq aqparat quraldary 6 jeltoqsan kúni Hanoı qalasynda ótetin eń iri 8WONDER Winter 2025 festıvalinde óner kórsetetin Dımash Qudaıbergen týraly jazǵan bolatyn.