Derevıanchenko Golovkınmen revansh týraly aıtty

NUR-SULTAN. QazAqparat – Orta salmaqtaǵy (72,6 kelige deıin) álem chempıony tıtýlyna eki ret úmitker bolǵan Ýkraına eliniń 34 jastaǵy boksshysy Sergeı Derevıanchenko (13-2, 10 KO) Premier Boxing Champions podkastynyń júrgizýshilerine suhbat berdi. Onyń barysynda qazaqstandyq Gennadıı Golovkınge (40-1-1, 35 KO) qarsy ótken sońǵy jekpe-jegi týraly aıtty. QazAqparat bul týraly Sports.kz saıtyna silteme jasap habarlaıdy.

Eske sala ketsek, ótken jyldyń qazan aıynda Derevıanchenko men Golovkın IBF-tiń bos tıtýly úshin jekpe-jek ótkizgen bolatyn. 12 raýndqa sozylǵan aıqasta tóreshiler jeńisti biraýyzdan Golovkınge berdi.

«Jekpe-jekti qaıta kórip shyǵýyma ýaqytym boldy jáne jeńiske men jettim dep oılaımyn», - dedi Sergeı.

Tóreshiler sheshimimen jeńilis tapqanyna qaramastan, ýkraınalyq boksshy bul kezdesý óz mansaby úshin tek oń yqpal etkenin atap ótti.

«Osy jekpe-jektiń arqasynda tanymaldylyǵym arta túskenin bilemin. Biraq men oǵan kóp daıyndaldym, ábden jattyqtym jáne ózimniń ónerime dán rızamyn. Bári artta qalǵanymen, munyń kezdeısoq bolmaǵanyn jáne álem chempıony ekenimdi barlyǵyna dáleldeý úshin, budan da kóp jattyǵýǵa yntalandyrady», - dedi ol.

Derevıanchenko «Golovkınmen revanshty ótkizýge qýana daıyn ekenin, biraq onymen bir mezgilde, munyń múmkin emestigin» aıtty. Sebebi Gennadııdi Kamıl Sheremetamen mindetti jekpe-jek kútip tur. Sondaı-aq «Kanelo» Alvarespen úshinshi kezdesý ótýi yqtımal.