Depýtattar 257 halyqaralyq is-sharaǵa qatysty
ASTANA. KAZINFORM – Depýtattar 257 halyqaralyq is-sharaǵa qatysyp, 38 shet eldiń Parlamentimen yntymaqtastyqty júzege asyrdy. Bul týraly Parlamenttiń 2-sessııasynyń jabylý rásiminde Májilis tóraǵasy Erlan Qoshanov aıtty.
«Ótken sessııa barysynda 6 parlamenttik fraktsııa, birmandatty jáne assambleıadan saılanǵan depýtattar belsene qyzmet atqardy. Fraktsııalar saılaýshylardyń suranysyna súıene otyryp, ózekti mindetterdi oryndaý baǵytynda júıeli jumys júrgizip otyr. Partııalardyń baǵdarlamasy men ıdeologııalary ár túrli bolsa da, memlekettik múddege kelgende bárimizdiń ustanymymyz ortaq. «Bir el – bir múdde», «Inklıýzıvti Parlament» jáne «Óńir» depýtattyq toptarynyń qyzmeti de osynyń kórinisi», - dedi palata spıkeri.
Erlan Qoshanov parlamenttik dıplomatııany damytýǵa erekshe kóńil bólinip otyrǵanyn aıtty.
«Sessııa barysynda depýtattar halyqaralyq 14 parlamenttik uıym sheńberinde belsendi jumys istedi. 257 halyqaralyq is-sharaǵa qatysyp, 38 shet eldiń Parlamentimen yntymaqtastyqty júzege asyrdy. Álemdik jáne dástúrli dinder lıderleri seziniń 20 jyldyǵyna arnalǵan Sezd hatshylyǵynyń 21-otyrysy joǵary deńgeıde ótti. Osy aıdyń basynda Almatyda Qazaqstannyń tóraǵalyǵymen Ujymdyq qaýipsizdik týraly shart uıymy Parlamenttik Assambleıasy Keńesiniń otyrysy boldy. Bıyl bizdiń Ortalyq Azııa elderi áıelderiniń dıalogyna tóraǵalyǵymyz aıaqtaldy», - dedi ol.
Erlan Qoshanov depýtattar halyqaralyq qaqtyǵystardyń aldyn alý men retteýde parlamenttik dıplomatııa tetikterin qoldaný mańyzdy dep biletindigin bas aıtty.
«Parlament osy oraıda Qazaqstannyń bitimgerlik kontıngentin Golan asýyna jiberýdi maquldady. Bul – Qazaqstan bitimgerleriniń Birikken Ulttar Uıymynyń mandaty boıynsha atqarǵan alǵashqy derbes mıssııasy», - dedi Májilis tóraǵasy.
