Depýtat astyq naryǵyndaǵy kemshilikterdi atady
ASTANA. KAZINFORM – Kórshi elder qazaqstandyq astyqty qaıta óńdep, ony halyqaralyq naryqqa jetkizip jatyr. Bul isti otandyq aýyl sharýashylyǵy taýaryn óndirýshiler de iske asyra alady. Osy oraıda senator Arman Óteǵulov óziniń depýtattyq saýalynda astyq óńdeýshilerdiń problemalary týraly aıtty.
«Un eksporty boıynsha Ózbekstan kóshbasshyǵa aınalyp, jyl saıyn 1 mln tonnaǵa deıin qazaqstandyq bıdaıdy óńdep, Aýǵanstan naryǵyna usynyp keledi. Bıyl Ózbekstanǵa 1,3 mln tonna astyq jóneltilgen. Qazirgi kezde eldegi 250-ge jýyq astyqty óńdeıtin kásiporynnyń tek 70 ǵana turaqty jumys istep tur. Táýelsizdik alǵan jyldary bul kásiporyndardyń sany shamamen 2 myń bolǵan, ıaǵnı 1750 astyq óńdeıtin kásiporyn jabylyp 70 myńdaı adam jumys ornynan aıyryldy. Aqsap turǵan bul sala memlekettiń múddesine jáne dıhanshylardyń ekonomıkalyq jaǵdaıyna keri áserin tıigizip jatyr», - dedi Arman Óteǵulov Úkimet basshysynyń atyna joldaǵan saýalynda.
Budan bólek senator Qazaqstannyń ımporttyq tuqym túrlerine degen táýeldiligin aıtty. Qazaqstanda elıtalyq tuqymdardyń úlesi – 7,1%. Sondaı-aq, elimizde bıdaı tuqymynyń 40% shetten keledi. Búginde Aýyl sharýashylyǵy mınıstrligine qarasty 12 ǵylymı-zertteý ınstıtýty jáne elıtalyq 17 tuqym óndirýshi sharýashylyq qyzmet etip keledi. Alaıda osy ınıstıtýttar zertteýleriniń oń nátıjesi baıqalar emes. Importtyq tuqymǵa degen suranystyń azaıǵany nemese eldegi óndirýshiler óniminiń molaıǵany týraly derek joq.
«Eldiń azyq-túlik qaýipsizdigin jáne aýyl sharýashylyǵy taýarlaryn óndirýshileriniń kórshi eldermen báseke qabiletti bolýyn qamtamasyz etý baǵytynda naqty jobalardy iske asyrýdy usynyp otyrmyz. Sheteldik tuqymǵa degen táýeldilikti joıý maqsatynda arnaıy baǵdarlama ázirleý kerek. Astyqty tereń óńdeıtin kásiporyndardyń sanyn arttyrýdy, memleket jaǵynan qosymsha qarjylandyrý máselesin qaraýdy usynamyz. Kásiporyndardyń ónimderin eksporttaýǵa kerek tetikterdi ońtaılandyrýdy jáne qajet bolǵan jaǵdaıda eksporttyq shyǵyndardyń bir bóligin memleket tarapynan qarjylandyrý týraly naqty sharalar qabyldaý kerek», - dedi senator.
