Denıs Ten: «Jaqyn arada ózimniń týǵan tilimdi oqýǵa múddelimin»
«Qazaq tili men úshin qyzyqty. Bunyń aldynda aqparat boldy ma, bilmeımin, men bala shaǵymda qazaq balabaqshasyna barǵanmyn. Ol kezde qazaq tilinde jetik sóıletinimdi bilmeppin de, sebebi tilderdiń arajigin ajyrata almadym. Sosyn taǵdyrdyń salǵany sol, meni 10 jasymda Máskeýge alyp ketti. Tıisinshe, mektepti de Máskeýde oqydym jáne qazirgi ýaqytta qazaq tiline qatysty bilimim umytylyp ketken. Búginde tek aýyzeki jáne qarapaıym áńgimelerdi azdap túsinemin, biraq ázirge qazaq tilinde sóılep, suhbat berýge meniń deńgeıim áli jetkiliksiz. Keshe ǵana Nurlan Qoıanbaevtyń «Túngi stýdııa» baǵdarlamasynda boldym, onyń baǵdarlamalarynyń barlyǵy qazaqsha ótedi, menimen bolǵan túsirilim de qazaq tilinde ótti, osy turǵydan alǵanda da tildi bilgen jaqsy. Jaqyn arada ózimniń týǵan tilimdi oqýǵa múddelimin», - dep atap ótti sportshy.
Degenmen, onyń aıtýynsha, kúntizbeniń tyǵyzdyǵyna baılanysty, memlekettik tildi oqýǵa ýaqyt ta, múmkindik te bola bermeıdi.
«Ony qalaı uıymdastyrý múmkin ekenin bilmeımin. Sebebi árdaıym álemniń túrli memlekettterine saparda bolamyn, AQSh-ta jattyǵý jasaıtyndyqtan, sonda kóp ýaqyt ótkizemin. Onyń ústine Qazaq-Brıtan ýnıversıtetinde oqyp jatyrmyn. Al onda sabaq tek aǵylshyn tilinde ótedi. Soǵan qaraǵanda meni mýltıtildi adam dep ataýǵa bolatyn sııaqty. Sózsiz, kelesi tildik bilimderimniń qataryna qazaq tili qosylady. Maǵan jankúıerler qazaq tilinde jazǵanda men qýanamyn, bul úlken qýanysh syılaıdy», - dedi D.Ten.
Alaıda, osyǵan qaramastan, Denıs Ten qazaq tilinde oıyn jetik jetkizetindeı deńgeıge jetýge qol jetkizýge maqsat qoıyp otyr.
«Erte me, kesh pe, qazaq tilin meńgeretinim anyq. Másele tek ýaqytqa tirelip tur, men óz ana tilimdi meńgerýge tek qýanyshty bolar edim. Qazir men tek sporttyq jetistikterimmen elime degen mahabbatymdy tanytyp júrmin, eger men ony óz halqymnyń tilimen de bildire alsam, bul maǵan da, ata-anama da úlken qýanysh bolatyny sózsiz. Men eń qonaqjaı elde týǵanyma baqyttymyn», - dep túıdi oıyn D.Ten.
Eske salsaq, bıyl naýryzda Shanhaıda ótken Álem birinshiliginde D.Ten Qazaqstan qorjynyna qola medal salǵan bolatyn. D.Ten Qazaqstan tarıhynda mánerlep syrǵanaýdan álemdik birinshilikterde jáne Olımpıada jarystarynda júlde salǵan alǵashqy sportshy ekenin aıta ketken jón.
