Dáriger atyn jamylǵan alaıaqtar quryqtaldy
ALMATY. Jeltoqsannyń 25-i. QazAqparat /Ádilet Musahaev / - Almatyda dáriger atyn jamylyp qylmys jasaǵan bir top adam ustaldy,
dep habarlaıdy QazAqparat ІІD baspasóz qyzmetine silteme jasap.
Arnaıy jedel tergeý jumystary barysynda Almatynyń bir JShS dırektorynan 50 myń AQSh dollaryn bopsalaý ústinde 1971 jylǵy Reseı azamaty men 1986 jylǵy QR azamatshasy quryqtalǵan. Belgili bolǵandaı, olar dırektorǵa jáne onyń otbasyna kúsh kórsete otyryp aqsha talap etken. Aq halat pen bet perde kıgen qylmyskerler kásipkerdiń páterine sanepıdemstansy qyzmetkeri retinde barǵan. Olar Almaty ákiminiń qaýlysymen dońyz tumaýyna qarsy halyqqa tegin em jasap júrgendikterin aıtqan. Jalǵan qaýly jasap alǵan qylmyskerler otbasy múshelerine shynydaǵy belgisiz suıyqtyqty ishýge beredi. Bul klofelın túıirshigi qosylǵan konıak ekeni anyqtalǵan. Suıyqtyqty ishken otbasy músheleri birden uıyqtap qalady. Qylmyskerler ketip qalǵan, tek keshke JShS dırektoryna qońyraý shalyp «Siz bizdiń múmkindikterimizdi baıqadyńyz, sizdi ýlandyrý qolymyzdan keldi. Eger 50 myń AQSh dollaryn berseńiz tiri qalasyz», dep qorqytqan.
Kásipker birden Almaty qalasyndaǵy uıymdasqan qylmyspen kúres basqarmasyna júginedi. Atalmysh uıymdasqan qylmyspen UQKB qyzmetkerleri 10 kúndeı jumys júrgizip, qylmyskerlerdi aqsha berý ústinde quryqtady. Sondaı-aq ustalǵandardyń medqyzmetkeri retinde úıge kirgen taǵy bir qylmystyq áreketteri áshkerlendi.
Quryqtaý kezinde er adamnan Reseı memleketiniń azamaty degen úsh tólqujat pen qynaptaǵy pyshaq tárkilengen. Sondaı pyshaq onyń sybaılasynan da tabylǵan. Jaldap turǵan páterlerinen medıtsınalyq quraldar, dári egý quraldary shyqqan. Qylmyskerlerdiń ústinen qylmystyq is qozǵalyp, tergeý jumystary júrgizilýde. Ustalǵandarǵa 7 men 15 jylǵa bas bostandyǵynan aıyrý jazasy berilýi múmkin.
