Dárihanany órtegen Túrkistan turǵyny órt ishinde qalyp qoıdy

TÚRKІSTAN. KAZINFORM- Qazirgi tańda polıtsııa tergeý amaldaryn júrgizip jatyr. Al kúdikti aýrýhanada em alyp jatyr.

Oqıǵa Maqtaaral aýdanyna qarasty Atakent aýylynda boldy. Áleýmettik jelide taraǵan vıdeodan betine maska kıgen jigittiń dárihana ishine belgisiz suıyqtyq shashyp júrgenin kórýge bolady. Jeli qoldanýshysy Nurjamal Remetovanyń jazýynsha, «psıhotroptyq dárilerdi satyp, jastardyń nashaqorlyqqa salynýyna úles qosty», - dep ashynǵan jigit «Muratfarm» dárihanasyna ot qoıyp jibergen. Sodan ózi de órt ishinde qalyp, kúıip qalǵan.

Túrkistan oblysy Polıtsııa departamentiniń baspasóz qyzmeti atalǵan oqıǵaǵa qatysty kúdikti anyqtalǵanyn jetkizdi.

«Túrkistan oblysy Maqtaaral aýdanyndaǵy dárihanalardyń birin órteý boıynsha qylmystyq is qozǵaldy. Kúdikti anyqtaldy, ol jergilikti turǵyn bolyp shyqty. Ol órtten kúıip qalǵan, búginde aýrýhanada em alyp jatyr. Basqa zardap shekkender men qaza tapqandar joq. Qazirgi ýaqytta polıtsııa tergeý amaldaryn júrgizilip, mán-jaılar anyqtalyp jatyr», - delingen Túrkistan oblysy Polıtsııa departamentiniń baspasóz qyzmeti usynǵan aqparatta.