Chehııada aspannan mıllıon dollar jaýdy
Chehııanyń Praga qalasyna jaqyn ornalasqan Lısa-nad-Labem qalasynda erekshe kórinis boldy. Kazma degen atpen belgili tanymal cheh blogeri jáne ınflıýenser Kamıl Bartoshek halyqqa aspannan mıllıon dollar aqsha jaýdyrdy, Kazinform bul týraly BNN-ge silteme jasap habarlaıdy.
Kazma Instagram jelisinde júrgizgen saýalnamasynan keıin tikushaqtan mıllıon dollar aqsha laqtyram degen sheshimge kelgen. Kórermender men qatysýshylar alańǵa shashylǵan bir dollarlyq qaǵaz aqsha polıetılen paketter men rıýkzaktarǵa salyp jatty. Shoýǵa shamamen tórt myńǵa jýyq qatysýshy jınaldy.
Kazma óz jazylýshylary arasynda baıqaý ótkizip, jeńimpazǵa mıllıon dollar berýdi ýáde etken. Ol úshin qatysýshylar onyń ONEMANSHOW: The Movie fılmindegi kodty sheshýi tıis boldy.
Alaıda kodty eshkim sheshe almaǵan soń, ol qosymsha jospar oılap tapty. Árbir aqsha belgisine izdeýshilerdi Donio platformasyna, qaıyrymdylyq saıtyna baǵyttaıtyn QR kod japsyrylǵan.
Bul - tek oıyn-saýyq sharasy ǵana emes, sonymen qatar qaıyrymdylyq kómekke shaqyrý boldy.
Oqıǵa úlken syn men daý týdyrdy. Aqshany bólýdiń zańdylyǵy, sondaı-aq salyq tóleýge baılanysty saldary kúmán týdyrdy. Aqsha belgilerine qarjylaı kómekke muqtaj adamdar týraly jazylǵan japsyrmalar da daý týdyrdy. Synshylarǵa ataqty adamdar men qoǵam qaıratkerleri de qosylyp, aqshanyń mańyzdyraq nársege jumsalǵany jón edi degen pikir bildirgen.
