BJZQ aqshasy qalaı basqarylyp otyr
ASTANA. KAZINFORM – Búgingi materıalda memleket Biryńǵaı jınaqtaýshy zeınetaqy qoryndaǵy qazaqstandyqtardyń aqshasyn Ulttyq bank arqyly qalaı basqaryp otyrǵanyna sholý jasaımyz.
BJZQ-nyń jalpy ishki ónimdegi úlesi tómendep keledi
BJZQ-daǵy qajettilik sheginen artylǵan somany turǵyn úı men emdelýge jumsaý ruqsaty berilgennen beri qazaqstandyqtardyń zeınetaqy jınaqtaryna degen qyzyǵýshylyǵy artqany baıqalady. Bul úrdisti halyqtyń qarjylyq saýatyn kóteretin oń tendentsııa dep baǵalaýǵa bolady. Áleýmettik jeliden «BJZQ-daǵy aqsham bir túnniń ishinde ondaǵan myń teńgege kemip qalypty» deıtin shaǵymdardy jıi oqıtyn boldyq. Ulttyq bank pen Qarjy naryǵyn retteý jáne damytý agenttigi de, BJZQ basshylyǵy da ondaı shaǵymdarǵa shottaǵy aqshanyń kólemi ınvestıtsııalyq tabysqa baılanysty qubylyp turatynyn aıtýdaı-aq aıtyp keledi.
- Ókinishke qaraı, salymshylar jıi túsinbeı jatady. BJZQ-nyń ınvestıtsııalyq tabystylyǵyn keıingi eki aıdyń qorytyndysyna qarap baǵalaýǵa bolmaıdy. «Men shyǵynǵa battym» dep jatady. Bul - olaı emes. Investıtsııalyq tabystylyqty uzaq merzimmen eseptep qaraý kerek, - deıdi Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva.
Biraq búgin-erteń artylǵan somany turǵyn úı máselesin sheshýge nemese emdelýge jumsaǵaly otyrǵan adam úshin sol sátte shottaǵy aqshanyń azaıyp shyǵa kelgeni ádiletsizdik bolyp kórinetini túsinikti. Qarjy naryǵynyń qarapaıym qısynǵa syıa bermeıtin qaltarystaryn qarapaıym tilmen taldap kóreıik.
Sonymen, elimizde BJZQ-ǵa 11 mln 141 myń 115 adam mindetti salymshy retinde, 439 myń 212 adam erikti salymshy retinde, 714 myń 78 adam mindetti kásiptik zeınetaqy salymshysy retinde tirkelgen. Demek, 20 mıllıonnan astam halyqtyń 12,2 mıllıony BJZQ-ǵa aı saıyn aqsha aýdaryp keledi degen sóz.
Ótken bir jyldyń ishinde salymshylardyń shotyndaǵy jınaqtarǵa 4 trln 674,2 mlrd teńge túsken. Osylaısha BJZQ-daǵy aktıvtiń jalpy somasy 22 trln 538,9 mlrd teńgege jetip otyr.
Qordyń bir jyldaǵy taza ınvestıtsııalyq kirisi 3 trln 334,8 mlrd teńgege nemese 35,6% ósken. 12 aıda qordan 1 trln 323,9 mlrd teńge tólem jasalǵan. Onyń 407,2 mlrd teńgesi turǵyn úı jaǵdaıyn jaqsartýǵa, 178,3 mlrd teńgesi emdelýge birjolǵy tólem retinde berilgen.
Bir jylda zeınetaqy jınaqtaryndaǵy aqshanyń jalpy massasy 26,2 paıyz ósken. Sonyń ishinde erikti jarnalardyń somasy 5,3 mlrd teńgeden 7,9 mlrd teńgege deıin nemese 49,1 paıyz artqan.
BJZQ aktıviniń teńgedeı mólsheri jyl saıyn artyp kele jatqanymen eldiń jalpy ishki ónimindegi úlesi 2022 jyldyń qańtarynan beri tómendep keledi. Bul kórsetkish 2022 jyldyń basynda 18,3 paıyz bolsa, 2023 jyly 15,6 paıyz, 2024 jyly 14,9 paıyz bolǵan.
BJZQ-nyń ınvestıtsııa portfelinde qaı eldiń úlesi basym?
Ulttyq banktiń BJZQ aktıvin ınvestıtsııalaý saıasatyn «tym konservatıvti» dep synaıtyndardyń daýsy keıingi kezde qattyraq shyǵyp júr. Shynymen de, BJZQ aqshasy tabystylyq kórsetkishi uzaq merzimde ǵana jaqsy nátıje beretin aktıvterge salynǵan. Esesine, ol aktsııalar men oblıgatsııalardyń quny kúrt túsip ketedi deıtindeı táýekel az.
Jýyrda Senat uıymdastyrǵan dóńgelek ústelde osy saıasat birtindep ózgeretini aıtyldy. Qarjy naryǵyn retteý jáne damytý agenttiginiń, Ulttyq Banktiń, Qazaqstan qarjygerleri qaýymdastyǵynyń, BJZQ-nyń jáne zeınetaqy aktıvterin basqarýshy kompanııalardyń ókilderinen qurylǵan jumys toby kiristiliktiń eń tómen deńgeıine jańa tásil engizý úshin kompozıttik ındeksti usynyp otyr.
Bul tásil ETF (túrli kompanııalar usynatyn quraldardan jasaqtalǵan ámbebap aktsııalar) satyp alý múmkindigin ashyp, shetel valıýtasyna ınvestıtsııalaý lımıtterin ulǵaıtýǵa baǵyttalǵan.
BJZQ aqshasy qandaı aktsııalar men oblıgatsııalarda jatyr? Emıtentter, qarjy quralynyń túri jáne ınvestıtsııalyq portfeldegi paıyzdyq úlesi mynadaı:
- QR Qarjy mınıstrligi (memlekettik baǵaly qaǵaz, ınvestıtsııalyq portfeldegi úlesi - 52,99%)
- «First Heartland Jusan Bank» AQ (oblıgatsııalar, 0,7%)
- «Qazaqstan Halyq Banki» AQ (jaı aktsııalar, 2,23%)
- «Bank TsentrKredıt» AQ (oblıgatsııalar, 0,31%)
- «Bank RBK» Banki» AQ (oblıgatsııalar, 0,92%)
- «ForteBank» AQ (oblıgatsııalar, 0,37%)
- «Otbasy bank» turǵyn úı qurylys jınaq banki» AQ (oblıgatsııalar, 0,33%)
- «Kaspi Bank» AQ (oblıgatsııalar, 0,65%)
- «Eýrazııalyq bank» AQ (oblıgatsııalar, 0,02%)
- «Nurbank» AQ (jaı aktsııalar men oblıgatsııalar, 0,03%)
- «Qazaqstan Damý Banki» AQ (oblıgatsııalar, 0,95%)
- «Báıterek» ulttyq basqarýshy holdıngi» AQ (oblıgatsııalar, 6,57%)
- «Eır Astana» AQ (jaı aktsııalar, 0,11%)
- «KEGOC» AQ (jaı aktsııalar men oblıgatsııalar, 0,56%)
- «Atameken-Agro» AQ (artyqshylyqty aktsııalar, 0,06%)
- «Ksell» AQ (jaı aktsııalar, 0,27%)
- «Fincraft Resources» AQ (artyqshylyqty aktsııalar, 0,02%)
- «Qazaqstan temir joly» Ulttyq kompanııasy» AQ (oblıgatsııalar, 1,42%)
- «BAıAN SÝLÝ» AQ (jaı aktsııalar, 0,00%, 630,2 mln teńge)
- «ABDI» AQ (oblıgatsııalar, 0,01%)
- «Qazaqtelekom» AQ (oblıgatsııalar, 0,22%)
- «Agrarlyq nesıe korporatsııasy» AQ (oblıgatsııalar, 0,21%)
- «Dosjan temir joly» AQ (oblıgatsııalar, 0,04%)
- «KazTransOıl» AQ (jaı aktsııalar, 0,05%)
- «Qazaqstannyń ornyqtylyq qory» AQ (oblıgatsııalar, 0,84%)
- «Ulttyq atom kompanııasy «Qazatomónerkásip» AQ (depozıtarlyq qolhattar, 1,39%)
- «Qazaqstan Turǵyn úı Kompanııasy» AQ (oblıgatsııalar, 0,06%)
- «SevKazEnergo» AQ (oblıgatsııalar, 0,02%)
- «AstanaGaz KMG» AQ (oblıgatsııalar, 0,55%)
- «Samuryq-Qazyna» Ulttyq ál-aýqat qory» AQ (oblıgatsııalar, 0,07%)
- CHINA CINDA 2020 I MNGMN (eýrooblıgatsııalar, 0,05%)
- PERUSAHAAN LISTRIK NEGAR /Indonezııa/ (oblıgatsııalar, 0,16%)
- EI SUKUK CO LTD /BAÁ/ (eýrooblıgatsııalar, 0,08%)
- Khazanah Capital LTD /Malaızııa/ (eýrooblıgatsııalar, 0,06%)
- MVM Energetika Zrt /Majarstan/ (eýrooblıgatsııalar, 0,10%)
- OFFICE CHERIFIEN DES PHO /Marokko/ (eýrooblıgatsııalar, 0,03%)
- Khazanah Global Sukuk Bhd /Malaızııa/ (eýrooblıgatsııalar, 0,06%)
- Saudi Arabian OIL CO (eýrooblıgatsııalar, 0,03%)
- CODELCO INC /Chılı/ (oblıgatsııalar, 0,19%)
- Swedish Export Credit Corporation (oblıgatsııalar, 0,37%)
- EXPORT-IMPORT BANK KOREA (oblıgatsııalar, 0,18%)
- NBN CO LTD (oblıgatsııalar, 0,12%)
- Korea Development Bank (oblıgatsııalar, 0,27%)
- ABU DHABI DEVELOPMENT HO (eýrooblıgatsııalar, 0,10%)
- MDGH SUKUK LTD /BAÁ/ (eýrooblıgatsııalar, 0,12%)
- Merrill Lynch /AQSh/ (PPN negizgi qorǵalǵan notalar, 0,05%)
- Masdar ABU DHABI (eýrooblıgatsııalar, 0,12%)
- Bank Gospodarstwa Krajow /Polsha/ (eýrooblıgatsııalar, 0,09%)
- ADNOC MURBAN RSC LTD /BAÁ/ (eýrooblıgatsııalar, 0,09%)
- Korea National Oil Corp (oblıgatsııalar, 0,03%)
- Freeport Indonesia PT (oblıgatsııalar, 0,11%)
- MDGH GMTN (RSC) LTD /BAÁ/ (eýrooblıgatsııalar, 0,09%)
- QNB FINANCE LTD /Qatar/ (eýrooblıgatsııalar, 0,08%)
- Korea Gas Corporation (oblıgatsııalar, 0,09%)
- Saudi Electricity Sukuk (eýrooblıgatsııalar, 0,30%)
- Korea Hydro & Nuclear Power (oblıgatsııalar, 0,15%)
- KOREA HOUSING-FINANCE CORPORATION (oblıgatsııalar, 0,15%)
- ARAB PETROLEUM INVST (eýrooblıgatsııalar, 0,12%)
- CPPIB CAPITAL INC /Kanada/ (oblıgatsııalar, 0,12%)
- Citigroup Inc (PPN, 0,00%, 548, 05 mln teńge)
- Emirates NBD Bank PJSC (eýrooblıgatsııalar, 0,03%)
- EMPRESA NACIONAL DEL PET /Chılı/ (oblıgatsııalar, 0,02%)
- Paragvaı Respýblıkasynyń Úkimeti (oblıgatsııalar, 0,08%)
- Indonezııa Respýblıkasynyń Úkimeti (oblıgatsııalar , 0,62%)
- Rýmynııa Úkimeti (eýrooblıgatsııalar, 0,30%)
- Fılıppın Respýblıkasynyń Úkimeti (oblıgatsııalar, 0,40%)
- Kolýmbııa Respýblıkasynyń Úkimeti (oblıgatsııalar, 0,45%)
- Shardja Ámirliginiń Úkimeti (eýrooblıgatsııalar, 0,18%)
- Amerıka Úkimeti (oblıgatsııalar, 12,33%)
- Perý Respýblıkasynyń Úkimeti (oblıgatsııalar, 0,26%)
- Izraıl Úkimeti (oblıgatsııalar, 0,16%)
- Oman Sultanatynyń Úkimeti (eýrooblıgatsııalar, 0,44%)
- Brazılııa Úkimeti (oblıgatsııalar, 0,45%)
- Panama Respýblıkasynyń Úkimeti (oblıgatsııalar, 0,28%)
- RF Qarjy mınıstrligi (eýrooblıgatsııalar, 0,09%)
- Meksıka Qurama Shtattary (oblıgatsııalar, 0,87%)
- Gvatemala Respýblıkasynyń Úkimeti (oblıgatsııalar, 0,04%)
- Saýd Arabııasy Úkimeti (eýrooblıgatsııalar, 0,25%)
- Marokko Koroldiginiń Úkimeti (eýrooblıgatsııalar, 0,15%)
- Qatar Úkimeti (eýrooblıgatsııalar, 0,14%)
- Indonezııa Respýblıkasynyń Úkimeti (oblıgatsııalar, 0,04%)
- Chılı Respýblıkasynyń Úkimeti (oblıgatsııalar, 0,15%)
- Vengrııa Úkimeti (eýrooblıgatsııalar, 0,18%)
- Shyǵys Ýrýgvaı Respýblıkasynyń Úkimeti (oblıgatsııalar, 0,04%)
- Saýd Arabııasy Úkimeti (eýrooblıgatsııalar, 0,07%)
- Polsha Respýblıkasynyń Úkimeti (oblıgatsııalar, 0,06%)
- Abý Dabı Ámirliginiń Úkimeti (eýrooblıgatsııalar, 0,09%)
- Bolgarııa Respýblıkasynyń Úkimeti (eýrooblıgatsııalar, 0,03%)
- Inter-American Investment Corporation (oblıgatsııalar, 0,14%)
- Eýropa qaıta qurý jáne damý banki (eýrooblıgatsııalar, 1,41%)
- Eýrazııalyq damý banki (oblıgatsııalar, 0,16%)
- Azııalyq damý banki (eýrooblıgatsııalar, 0,19%)
- Central American Bank for Economic Integration (oblıgatsııalar, 0,15%)
- OPEC Fund for International Development (eýrooblıgatsııalar, 0,18%)
- KASE klırıngk ortalyǵy AQ (klırıngtik qatysý sertıfıkaty, 0,09%)
- Qazaqstan Respýblıkasy Ulttyq Banki (salymdar, 3,96%)
BJZQ-nyń shetel valıýtasymen saqtaýly aktıvteri 41,2% bolsa, teńgemen saqtaýly aktıvteri - 58,8%.
«BJZQ – Ulttyq qor emes»
Qarjy sarapshylarynyń arasynda BJZQ-nyń ınvestıtsııalyq saıasaty burynǵydaı barynsha saqtyqqa qurylý kerek dep esepteıtinder kóp. Óıtkeni, at tóbelindeı toptyń qate sheshimi mıllıondaǵan adamnyń taban aqy, mańdaı terimen tapqan zeınetaqy jınaǵyn qunsyzdandyryp jiberýi múmkin.
Marııa Hadjıevanyń Senat depýtatynyń suraǵyna jaýap bere otyryp:
- BJZQ – Ulttyq qor emes. Ol jerde árbir qazaqstandyqtyń eńbekpen tapqan aqshasy jatyr, - degeni osy paıymdarmen úndes.
Mundaı kúmánder BJZQ aqshasy «Eır Astana» aktsıonerlik qoǵamynyń aktsııalaryna salynǵannan keıin kúsheıe tústi. Osydan bir jyl buryn ІRO-ǵa shyǵarylǵan kezde Air Astana aktsııalary 1 200 teńgeden satylǵan bolatyn. Bir jyldyń ishinde aktsııalardyń quny 25 paıyz túsip ketken.
Kompanııa basshysy Pıter Foster jýyqta BAQ-qa bergen suhbatynda bul jaǵdaıdy búkil álemdegi tendentsııa retinde baǵalap, naryqtaǵy iri oıynshylardyń ishinde 1-2 kompanııanyń aktsııasy ǵana 2024 jyly ósim kórsetkenin aıtty.
«BJZQ aqshasyn áýe kompanııasynyń aktsııasyna salar kezde sheshim qabyldaǵan laýazymdy adamdar osy jaǵyn nege eskermegen?» deıtin suraq týyndaıdy.
Ulttyq bank Monetarlyq operatsııalar departamentiniń dırektory Nurjan Tursynhanov bıylǵy kórsetkishterge qarap Air Astana aktsııalaryna aqsha salý qate boldy dep aıtýǵa erte dep esepteıdi.
- Investıtsııalyq qyzmetti naqty bir qarjy quralymen ǵana ólsheýge bolmaıdy. Óz sátinde tabysty quraldar da, tabysy azyraq quraldar da bolady. Bul jumysty belgili kezeńde jáne portfelder jıyntyǵynda qaraý kerek. Jalpy ınvestıtsııalar portfelin alyp qarasaq, úlesi 0,1 paıyz ǵana shyǵar. Sondyqtan naqty bir quraldyń belgili bir ýaqytta quldyrap ketkenine qarap. ınvestıtsııanyń qanshalyqty sátti ne sátsiz bolǵanyn baǵalaýǵa bolmaıdy. Men jalpy portfeldi baǵalaı alamyn. Jalpy portfel aıtarlyqtaı tabysty, - deıdi Ulttyq bank ókili.
Jalpy 2024-2025 jyldarǵa BJZQ-dan 2 trln teńgege deıin ǵana alý týraly shek qoıylǵan.
- Búginge deıin qordyń 173 mlrd teńgesi Ónerkásipti damytý qorynyń kólik ınfraqurylymy salasyndaǵy jobalaryn qarjylandyrýǵa, 213 mlrd teńgesi agroónerkásip kesheni jobalaryn qarjylandyrýǵa baǵyttaldy, - deıdi Ulttyq bank tóraǵasynyń orynbasary Aqyljan Baımaǵambetov.
Ulttyq ekonomıka mınıstrligi BJZQ-nyń 1,5 trln teńgesin «Samuryq-Qazynanyń» elektr energııasyn óndirý jáne gaz óńdeý jobalaryna berýdi usynyp otyr.
Al atalyp ótken 173 mlrd teńge «Báıterek» arqyly «Qazaqstan temir joly» ulttyq kompanııasyna Stadler vagondaryn satyp alýǵa berildi. El arasynda «QTJ» - ulttyq kompanııalardyń ishindegi eń táýekeli joǵary qurylym» deıtin pikir bar. Byltyr Joǵary aýdıtorlyq palata tóraǵasy Álıhan Smaıylovtyń «Qazaqstan temir joly» defolt aldynda turǵanyn aıtqany esimizde. Quzyrly organdaǵy quzyretti mamandardyń ózi jaǵdaıyn osylaı baǵalap otyrǵan kompanııanyń jobasyna BJZQ aqshasynyń salynyp jatqanyn salymshylar unatyp otyr deýge kelmes.
Jınaǵyńyzdy ózińiz basqarǵyńyz kelse...
Osyndaıda salymshylar tarapynan: «Jınaqtaǵy aqshamyzdy nege bizben aqyldasyp salmaıdy», «Birde kedeı, birde baı «QTJ» men Air Astana-ǵa salǵansha álem boıynsha tabystylardyń kóshin bastap turǵan Apple, Microsoft, Tesla-ǵa nege salmaıdy?» - deıtin suraq kóp qoıylady.
Ulttyq bank ókili Nurjan Tursynhanovtyń Senat qabyrǵasynda aıtqan málimetine súıensek, BJZQ aqshasy salynǵan sheteldik valıýtamen saqtaýly 1 myńnan astam emıtenttiń ishinde Apple, Microsoft, Tesla-nyń quraldary da bar.
Bul jerde áńgime álemniń damyǵan elderine tıesili kompanııalardyń aktsııalarynan turatyn Custom MSCI World Index etalon portfeli týraly bolyp otyr. Qańtarda aktsııalar sýbportfeliniń quny 165,55 mlrd teńgege ulǵaıǵan. 23 damyǵan elge tıesili kompanııalardyń 1 352 aktsııasynan quralǵan ındekstiń 73,2%-y AQSh kompanııalarynyń aktsııalary bolyp otyr. Sonyń ishinde eń tabysty on quraldyń arasynda Apple birinshi, Microsoft úshinshi, Tesla jetinshi orynda tur.
Nurjan Tursynhanov salymshylardyń «BJZQ aqshasyn ınvestıtsııalamaı turyp bizben nege aqyldaspaıdy?» degen ýájin orynsyz dep esepteıtinin aıtady.
- Áleýmettik kodeks pen Ulttyq bank týraly zańda Ulttyq bank zeınetaqy aktıvterin senimgerlik negizde basqarýshy bolyp bekitilgen. Búgingi tańda zeınetaqy qorynda 22 trln teńgeden astam aqsha bar. Ulttyq banktiń mindeti – qordyń shynaıy tabystylyǵy. Ótken jyldyń qorytyndysy boıynsha ınflıatsııa 8,6 paıyz bolǵanda, BJZQ tabystylyǵy 17,84 paıyz boldy. Sonda biz salymshylarǵa shynaıy mánde 9 paıyz tabys ákeldik degen sóz. Keıingi 10 jyldyń kórsetkishin qarasaq, jıyntyq ınflıatsııa 156 paıyz bolǵanda, tabystylyq 180 paıyz boldy. Demek, keıingi 10 jylda Ulttyq banktiń senimgerlik basqarýyndaǵy BJZQ jyl saıyn ınflıatsııa deńgeıinen joǵary tabystylyq kórsetip keledi, - deıdi ol.
Zańnama boıynsha salymshylar zeınetaqy jınaqtarynyń 50%-yna deıin ınvestıtsııalyq portfeldi jeke basqarýshylarǵa bere alady. Ol úshin salymshy Biryńǵaı jınaqtaýshy zeınetaqy qoryna basqarýshy kompanııany tańdaý týraly ótinish berýi qajet. Al ondaı basqarýshylardyń tizimin Qarjy naryǵyn retteý jáne damytý agenttigi resmı saıtynda únemi jańartyp otyrady.
Bir sózben aıtqanda, Ulttyq banktiń BJZQ-aqshasyn ınvestıtsııalaý saıasatyna kóńili tolmaıtyn adam ózine qolaıly basqarýshy kompanııany tańdap, jınaqtaǵy aqshasynyń teń jartysyn osy salaǵa mamandanǵan adamdarǵa senip tapsyra alady.
2025 jyldyń basyndaǵy jaǵdaı boıynsha 50 myńnan astam salymshynyń 65 mln teńgeden astam jınaǵy jeke kompanııalardyń basqarýynda.
2025 jyldyń 1 aqpanyndaǵy jaǵdaı boıynsha zeınetaqy jınaqtarynyń bir bóligin ınvestıtsııalyq portfeldi basqarýshyǵa aýdarý týraly ótinishteriniń sany men somasy tómendegideı:
Al 1 qańtardaǵy jaǵdaı boıynsha «Jusan Invest» AQ-nyń senimgerlik basqarýyndaǵy zeınetaqy aktıvteri 10 mlrd 728,34 mln teńge bolǵan. Teńgemen nomınaldanǵan quraldardyń ortasha kiristiligi jyldyq mejede - 12,81%, dollarmen nomınaldanǵan quraldardyń ortasha kiristiligi - 4,78%, eýromen - 9,9% kórsetken.
«Halyk Global Markets» AQ senimgerlik basqarýyndaǵy zeınetaqy aktıvteriniń ınvestıtsııalyq portfeli 4 mlrd 846,99 mln teńgege jetken. Teńgemen nomınaldanǵan quraldardyń ortasha kiristiligi jyldyq mejede - 12,17%, dollarmen nomınaldanǵan quraldardyń ortasha kiristiligi - 5,91% bolǵan.
«BCC Invest» AQ senimgerlik basqarýyndaǵy zeınetaqy aktıvteri 5 mlrd 506,86 mln teńgege jetken. Teńgemen nomınaldanǵan quraldardyń ortasha kiristiligi jyldyq mejede - 12,63%, dollarmen nomınaldanǵan quraldardyń ortasha kiristiligi - 6,06% bolǵan.
«Halyk Finance» senimgerlik basqarýyndaǵy zeınetaqy aktıvteri 42 mlrd 242,07 mln teńge bolǵan. Teńgemen nomınaldanǵan quraldardyń ortasha kiristiligi jyldyq mejede - 11,72%, dollarmen nomınaldanǵan quraldardyń ortasha kiristiligi - 5,42% kórsetken.
«Sentras Sekıýrıtız» AQ senimgerlik basqarýyndaǵy BJZQ zeınetaqy aktıvteri 1 mlrd 907,89 mln teńgege jetken. Teńgemen nomınaldanǵan quraldardyń ortasha kiristiligi jyldyq mejede - 12,29%, dollarmen nomınaldanǵan quraldardyń ortasha kiristiligi - 5,30% bolǵan.
Al Ulttyq Bankiniń senimgerlik basqarýyndaǵy BJZQ zeınetaqy aktıvteri 22 trln 415 mlrd teńgege jetken. Teńgemen nomınaldanǵan quraldardyń ortasha kiristiligi jyldyq mejede - 11,33%, sheteldik valıýtamen nomınaldanǵan quraldardyń ortasha kiristiligi - 5,05% bolǵan.