BUU-da Astana kodeksi daıarlanyp jatyr - Ábdirahmanov

ASTANA. QazAqparat - Astana kodeksi BUU-ǵa joldandy. QR Syrtqy ister mınıstri Qaırat Ábdirahmanovtyń aıtýynsha, atalǵan qujatta Memleket basshysy Nursultan Nazarbaevtyń halyqaralyq terrorızmge qarsy birqatar bastamalary kórinis tapqan jáne kodeks terrorızmge qarsy kúreste birlesip jumys isteýdi kózdeıdi, dep habarlaıdy QazAqparat tilshisi.

"Ol qujat terrorızmge qarsy, shyn máninde, kúrsýge daıyn taraptardyń kúshin biriktirýge arnalyp otyr. Qazirgi kezde BUU sarapshylary men qazaqstandyq mamandar kodeks boıynsha birlesip jumys istep jatyr. Atalǵan qujat aldymen BUU Qaýipsizdik keńesiniń talqysyna shyǵarylady", - dedi Ábdirahmanov Eýrazııalyq medıa forýmnyń búgingi sessııasynda. Atalǵan otyrys Sırııadaǵy daǵdarys máselesine arnaldy.
Mınıstr kodekstiń mazmunyn ashqan joq. Sebebi birlesken jumys barysynda biraz máselelerdi pysyqtaý qajet. Máselen, "terrorızm" sóziniń naqty anyqtamasyn, oǵan jatatyn toptardy kórsetken jón. "Árıne, eń bastysy, saıası dıalog ornatqan jón. Sosyn kodeks aıasynda terrorızmge qarsy kúresetin memleketterdiń naqty ustanymyn aıqyndaý qajet. Biz osyny kózdeımiz. BUU sarapshylary men Qaýipsizdik keńesiniń músheleri Astana kodeksin maquldaǵannan keıin atalǵan qujat qoǵamnyń talqylysyna shyǵarylatyn bolady", - dep atap kórsetti mınıstr
Aıta keteıik, BUU Qaýipsizdik keńesiniń otyrysynda QR Prezıdenti Nursultan Nazarbaev terrorızmge qarsy halyqaralyq operatsııalardy ótkizýge arnalǵan ortaq kodeksti daıarlaýdy usynǵan bolatyn. "Atalǵan qujattyń negizinde terrorızmge qarsy jahandyq koalıtsııany qurýǵa bolady. Al BUU sonyń bastamashysy boldy", - dedi N.Nazarbaev.