Burynǵy Jusan Bank memleketke áli 950,2 mlrd teńge qaryz

ASTANA. KAZINFORM – Qarjy daǵdarysy kezinde memleketten qarjylaı kómek alǵan bankterdiń bári aldaǵy 3-5 jyldyń ishinde qaryzyn túgel qaıtaryp bitedi. Tek Alatau City Bank (burynǵy Alatau City Bank  - red.) qana bul merzimde qaryzyn qaıtaryp úlgermeıtini belgili boldy.

Bul týraly Qarjy naryǵyn retteý jáne damytý agenttiginiń tóraıymy Mádına Ábilqasymova Májilis depýtatynyń suraǵyna bergen jaýabynda aıtty.

- Bankterge berilgen memlekettik kómek týraly aıtsaq, qazir 4 bankte 1,3 trln teńge mólsherinde memleket qarajaty bar. Atap aıtqanda, Eýrazııalyq bankte – 150 mlrd teńge, RBK bankte – 176,8 mdrd teńge, Alatau City Bank-te – 950,2 mlrd teńge, Nur Bank-te 46,8 mlrd teńge bar, - dedi agenttik basshysy.

Sondaı-aq, ol agenttik 2022 jyldan bastap bank zańnamasyna ózgerister engizgenin eske saldy.

- Bankterdiń memleketten alǵan kómekti tezirek qaıtarýyna baǵyttalǵan jańa talaptar qoıdyq. Memleketten kómek alǵan bankterdiń aktsıonerlerine dıvıdend alýǵa tyıym saldyq. Osy tyıymnan keıin bankter memleket aldyndaǵy qaryzyn tezirek qaıtara bastady. 2023-2025 jyldar arasynda 526,9 mlrd teńge mezgilinen buryn qaıtaryldy. Onyń ishinde Halyq Bank 250 mlrd teńgeni tolyq qaıtardy. Alatau City Bank 150 mlrd teńgeni merziminen buryn, Bank Tsentr Kredıt 60 mlrd teńgeni tolyq qaıtardy. RBK bank 66,9 mlrd teńgeni ótedi. Bul jumysty Ulttyq bankpen birge jalǵastyryp jatyrmyz.

Bıyldan bastap memleket aldynda kómek qarysy bar bankterge mınımaldy rezerv talabyn kóterdik. Bankter qalǵan qaryzdaryn aldaǵy 3-5 jyldyń ishinde qaıtarady, Alatau City Bank-ten basqasy, - dedi Mádına Ábilqasymova.

Aıta keteıik,  Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasy tanystyrdy.