Býrabaıda Ulttyq quryltaıdyń IV otyrysy bastaldy
BÝRABAI. KAZINFORM — Býrabaıda Prezıdent Qasym-Jomart Toqaevtyń qatysýymen Ulttyq quryltaıdyń IV otyrysy bastaldy.
- Atyraýdaǵy otyrystan keıin arnaıy jospar qabyldandy. Soǵan sáıkes Parlament depýtattarynyń qoldaýymen turmystyq zorlyq-zombylyqqa, qumar oıynǵa, nashaqorlyqqa, esirtki saýdasyna jáne vandalızmge qarsy zańdar qabyldandy. Elektrondy shylym túrlerin óndirýge jáne satýǵa tyıym salyndy. Memlekettik nagradalar qatary mártebeli ataqtarmen tolyqty. Kitap oqý mádenıetin qalyptastyrý úshin Ulttyq kitap kúni bekitildi.
Jalpy byltyrǵy quryltaıda aıtylǵan bastamalardy júzege asyrý úshin bir jyldyń ishinde 10 zań daıyndalyp, qazirdiń ózinde sonyń toǵyzy qabyldandy.
Bıyl quryltaı aıasynda óńirlermen jumys isteý formaty engizildi. Ulttyq quryltaı músheleri aımaqtarǵa shyǵyp, kezdesýler ótkize bastady. Bul aımaqtaǵy belsendi azamattardyń pikirin eskerýge de múmkindik berdi, - dedi Memlekettik keńesshi Erlan Qarın jıyndy asha otyryp.
Otyrysta Memleket basshysy sóz sóıleıdi. Sondaı-aq Ulttyq quryltaı músheleri qoǵamdaǵy ózekti máselelerge qatysty usynystaryn ortaǵa salady.
Aıta ketý kerek, quryltaıdyń paneldik sessııalary keshe ótti. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.
Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi.
Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymy ázirlenetinin aıtty.
2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.