Búgin - Otan qorǵaýshy kúni
ASTANA. KAZINFORM – Búgin qazaqstandyqtar Otan qorǵaýshy kúnin atap ótedi.
1992 jyly 7 mamyrda Qazaqstan Respýblıkasy Prezıdentiniń Qarýly kúshterdi qurý týraly №745 Jarlyǵy jarııalandy. Jarlyqta otandyq qarýly kúshti qalyptastyryp, ol úshin tıisti jaǵdaı jasaý kerektigi aıtylǵan. Bul – el tynyshtyǵyn qorǵap, beıbitshilikti qamtamasyz etetin áskerı qyzmetshilerdi quttyqtap, qurmet kórsetetin kún.
Aıta keteıik, Qazaqstan Qarýly kúshter qatarynda er azamattarmen qatar, názik jandar da teńdeı qyzmet atqaryp keledi. Olardyń kópshiligi ofıtser ataǵyna ıe. Sondyqtan, Otan qorǵaýshy kúni – qyz-kelinshekterdiń de merekesi.
Qazaqstan áskeri qurylymynda qurlyq áskerleri, áýe qorǵanysy áskerleri jáne áskerı-teńiz kúshteri qamtylǵan. Sonymen qatar, Qazaqstan Respýblıkasynyń Joǵarǵy bas qolbasshysy, Prezıdenttiń tikeleı baǵynysynda arnaıy daıyndalǵan aeroutqyr áskerleri bar. Olardyń maqsaty – tótenshe jaǵdaıda erekshe qupııa operatsııalardy júrgizý.
2012 jyly 7 mamyr memlekettik mereke bolyp jarııalandy jáne demalys kúni sanalady.
Ataýly kún qarsańynda eńbegi sińgen sala mamandaryna áskerı ataqtar berý jáne erekshe kózge túsken áskerı qyzmetshilerge nagradalar tapsyrý dástúrge aınalǵanyn atap ótý qajet.
Osy oraıda 5 mamyr kúni Prezıdent Qasym-Jomart Toqaev memlekettik nagradalar, joǵary áskerı jáne arnaýly ataqtar, synyptyq shender tapsyrý rásimine qatysty.
Memleket basshysy – Qazaqstan Qarýly Kúshteriniń Joǵarǵy Bas qolbasshysy saltanatty jıynda sardarlar men sarbazdardy aldaǵy Otan qorǵaýshy kúnimen quttyqtady. Sonymen qatar patrıotızm men jaýyngerlik rýhtyń sımvolyna aınalǵan mereke kúnderi elge qorǵan bolyp júrgen azamattarǵa qurmet kórsetý, Otan úshin ot keshken aǵa býynnyń rýhyna taǵzym etý, olardyń janqııarlyǵy men óshpes erligin urpaqtyń jadynda jańǵyrtý dástúrge aınalǵanyn atap ótti.
Prezıdenttiń aıtýynsha, memleket Qarýly Kúshterdiń áleýetin nyǵaıtýǵa aıryqsha mán berip otyr.
Aıta keteıik, búgin Ekinshi dúnıejúzilik soǵystaǵy Jeńistiń 80 jyldyǵyna arnalǵan elordada ótetin áskerı sherý barlyq respýblıkalyq telearnadan tikeleı efırde kórsetiledi.
Saltanatty is-sharaǵa 4 000-nan astam áskerı qyzmetshi, 200-den astam áskerı tehnıka, sondaı-aq maıdandyq, armııalyq jáne áskerı-kóliktik avıatsııanyń 66 ushaǵy men tikushaǵy qatysady.