Búgin – Memlekettik rámizder kúni
ASTANA. KAZINFORM – Búgin – Memlekettik rámizder kúni. Bıyl memlekettigimizdiń sımvoldarynyń qabyldanǵanyna 32 jyl toldy.
1992 jyldyń basynda memlekettik úsh nyshan – Tý, Eltańba jáne Ánuranymyzdy tańdaý úshin Joǵarǵy keńes prezıdıýmy jumys tobyn quryp, arnaýly shyǵarmashylyq komıssııa taǵaıyndady. Onyń quramyna Salyq Zımanov, Erbol Sháımerdenov, Serikbolsyn Ábdildın, Serik Ábdrahmanov jáne taǵy basqa qaıratkerler kirdi. Osydan keıin búkil Qazaqstan kóleminde Eltańba, Tý, Ánuran nusqalaryna konkýrs jarııalandy.
Bir ǵana týdyń ózine 600 adamnan 1 200 nusqa tússe, Eltańbanyń 245 jobasy, ánurannyń 750 úlgisi baıqaýǵa qatysty.
Estetıkalyq sıpatymen de, tarıhı, saıası, ekonomıkalyq sımvolızmge sáıkes kelýi boıynsha da úzdik týyndy usynǵan baıqaý jeńimpazdaryn qazir halyq memlekettik nyshan avtorlary retinde tanıdy.
Olar: Tý avtory - Sháken Nııazbekov. Eltańba avtorlary - Jandarbek Málibekov pen Shota Ýálıhanov.
Sonymen qatar Táýelsiz Qazaqstannyń tuńǵysh ánuran avtorlary retinde - áýenin jazǵan Muqan Tólebaev, Evgenıı Brýsılovskıı men Latıf Hamıdıdiń esimi tarıhta qaldy. Úzdik mátinge jarııalanǵan baıqaýda Muzafar Álimbaev, Qadyr Myrzalıev, Tumanbaı Moldaǵalıev jáne Jadyra Dáribaeva jeńip shyqty. Keıin, ıaǵnı, 2006 jyly jańa memlekettik gımn qabyldandy. Tańdaý el arasynda keńinen tanymal «Meniń Qazaqstanym» ánine túsken edi.
1956 jyly sazger Shámshi Qaldaıaqov pen Jumeken Nájimedenovtiń shyǵarmashylyq tandeminen shyqqan týyndynyń bastapqy mátinin Tuńǵysh Prezıdent Nursultan Nazarbaev óńdedi.
2006 jyly 6 qańtarda Qazaqstan Parlamenti jańa memlekettik gımnin bekitti. Birinshi ret ol 2006 jyly 11 qańtarda Memleket basshysynyń saltanatty ulyqtaý rásiminde oryndaldy.
2007 jyly 4 maýsymda qabyldanǵan «Qazaqstan Respýblıkasynyń Memlekettik rámizderi týraly» Konstıtýtsııalyq Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi.
Aıta keterligi, osy jyldyń 15 naýryzynda Atyraýda ótken Ulttyq quryltaıynda Memleket basshysy Qasym-Jomart Toqaev Qazaqstannyń jańa Eltańbasynyń jobasyn jasaýǵa ashyq baıqaý jarııalanatyndyǵyn aıtqan edi.
«Eltańbamyzǵa qatysty synı pikirler aıtylyp qalady. Ony Keńes zamanyndaǵy Gerbke uqsatyp jatady. Tym eklektıkalyq, kúrdeli deıdi. Mundaı oıdy el isine beı-jaı qaramaıtyn belsendi azamattar ǵana emes, mamandar da aıtyp júr. Oryndy paıymdar eskerýsiz qalmaýy kerek. Ortaq kelisimge kelgen jaǵdaıda arnaýly komıssııa qurýǵa bolady. Bul komıssııa máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baıqaý jarııalanady», - dedi Qasym-Jomart Toqaev.
Sál keıinirek Qarjy mınıstri Mádı Takıev Eltańbany aýystyrýǵa qatysty oń sheshim qabyldanǵan jaǵdaıda ǵana shyǵystaryna baılanysty qalǵan jaıttar qarastyrylatyndyǵyn atap ótti.
Al Memlekettik keńesshi Erlan Qarın Jibek Joly telearnasyndaǵy «Ýáde» baǵdarlamasyna bergen suhbatynda Memleket basshysy óz sózinde «Eltańbany aýystyrýǵa qatysty ártúrli pikirdiń aıtylatyndyǵyn, eger qajet bolsa, komıssııa quryp talqylaý qajettigin, oń sheshim qabyldansa baıqaý jarııalaý kerektigin» ǵana aıtqanyn alǵa tartady.
«Memleket basshysy Eltańbany mindetti túrde aýystyrý kerek degen pikir aıtqan joq. Ókinishke oraı, kópshiligi málimdemeni durys qaramaıdy, oqymaıdy, tyńdamaıdy. Shyn mánisinde, Prezıdent ol jerde qoǵamda keıbir azamattyń Eltańbaǵa qatysty ártúrli pikir aıtyp júrgenin, máselege qatysty ustanym qalyptassa, onda ashyq túrde talqylaý» kerektigi týraly pikir aıtty», - deıdi ol.
