Hokkeıden ÁCh: Qazaqstan quramasy Japonııany iri eseppen jeńdi
ASTANA. KAZINFORM – Shaıbaly hokkeıden Qazaqstan quramasy birinshi dıvızıonnyń A tobynda búgin ekinshi oıynyn Japonııaǵa qarsy ótkizdi.
Kezdesý barysynda qazaqstandyq hokkeıshiler jınaqy qımyl kórsetti. Degenmen birinshi kezeńde qarsylastar bir-biriniń qaqpasynan sańylaý taba alǵan joq.
Ekinshi kezeńde otandastarymyz japonııalyq qaqpashyny úsh márte qapy qaldyrdy. Úshinshi kezeńde de qazaqstandyq hokkeıshiler taǵy úsh márte kózge tústi.
Qazaqstan - Japonııa 6:0 (0:0, 3:0, 3:0)
1:0 - Qaıyrjan (Gatııatov, Ómirbekov) - 22:11
2:0 - Shaıhmeddenov (Gatııatov) - 27:56
3:0 - Breýs (Gatııatov, Ásetov) - 33:13
4:0 - Ásetov (Danııar, Shestakov) - 53:40 GB
5:0 - Starchenko (Muratov, Shestakov) - 55:50
6:0 - Lıapýnov (Ómirbekov, Qaıyrjan) - 56:26
Osylaısha Qazaqstan quramasy qarsylasynan 6:0 esebimen basym tústi.
Aıta keteıik, eki qurama qazirge deıin 12 márte kezdesip, barlyǵynda otandastarymyz jeńiske jetti.
Endi Qazaqstan quramasy alda úsh oıyn ótkizedi. Aldymen 5 mamyrda Qazaqstan ýaqytymen 22:30-da Polshamen kezdesse, 7 mamyrda 19:00-da Ýkraına, 8 mamyrda 15:30-da Frantsııamen sheberlik baıqasady.
Budan buryn qazaqstandyq hokkeıshiler Lıtva quramasynan 4:1 esebimen basym tústi.
Atalǵan topta alǵashqy eki oryn alǵan quramalar 2027 jyly elıtalyq dıvızıonda baq synaýǵa múmkindik alsa, sońǵy oryndy mise tutqan qurama V tobyna túsip qalady.
Eske sala ketsek, qazaqstandyq hokkeıshiler alǵashqy oqý-jattyǵý jıynyn 17 sáýirge deıin Astana qalasynda ótkizdi. Odan keıin Belarýste 26 sáýirge deıin daıyndyq júrgizdi. Onda 25 sáýirde jergilikti «Dınamo-Molodechno» komandasynan 5:1 esebimen basym tústi.
Al 25 sáýirde joldastyq kezdesýde qazaqstandyq hokkeıshiler Slovenııa quramasyn 2:1 esebimen qapy qaldyrdy.
