Búgin Kentaýdaǵy JEO iske qosyldy

TÚRKІSTAN. KAZINFORM – Búgin Kentaý qalasynda ornalasqan jylý energo ortalyqtaǵy qazandyqtyń biri iske qosyldy. Al, erteńnen bastap qaladaǵy magıstraldy júıege jylý berile bastaıdy. Bul týraly «Kentaý-Servıs» KMM dırektory Saıahat Ybyshev málimdedi.

Qaladaǵy turǵyn úılerge 20-shy qazanan bastap jylý beriledi dep kútilýde. Áleýmettik nysandarda kezeń-kezeńimen júıege qosylady. 

«Jylý energo ortalyq bıylǵy qysqy maýsymdy 6 qazandyqpen bastap otyr. Sonyń bireýi búgin iske qosyldy. Qalǵany rezervte tur. Jalpy bıyl tozyǵy jetken qazandyqtar qaıta qurý jumystarynan ótti. Atap aıtqanda, №8,11,9,10 qazandyqqa kúrdeli jóndeý jumystary júrgizildi. Budan bólek, 2 qazandyq aǵymdaǵy jóndeýden ótti. Qalǵan №7 jáne №12 qazandyqtardyń qaıta qurý jumystary qarasha aıynyń sońyna deıin jalǵasady dep kútilýde» - dedi Saıahat Ybyshev.

Jylý energo ortalyqtaǵy qazandyqtardyń kúl ustaǵyshynan bastap, tóbesindegi murjasyna deıin aýysty. Sondaı-aq, jańadan ornatylǵan qazandyqtardy keleshekte gazǵa aýystyrýǵa múmkindikter qarastyrylǵan. ıAǵnı, aldaǵy ýaqytta ortalyq kómirden gazǵa kóshetin bolady. 

Sondaı-aq, bıyl Kentaý qalasyndaǵy 6,6 shaqyrym magıstraldy jylý jelileri qaıta jańartyldy. Oǵan respýblıkalyq bıýdjetten 4,6 mlrd teńge qaraldy. Sonymen qatar 14,5 shaqyrym jylý jelilerin rekonstrýktsııalaý boıynsha joba ázirlendi.

Aıta keteıik, Kentaý qalasynyń jylý elektr ortalyǵynyń irgetasy 1934 jyly qalanyp, jabdyqtary 1952 jyly ornatylǵan. Sondaı-aq, negizgi materıaldyq jabdyqtarynyń 85 paıyzy tozǵan bolatyn. Búginde JEO elektr energııasyn óndiredi jáne Kentaý qalasynyń turǵyndaryn jylýmen qamtamasyz etetin jalǵyz strategııalyq nysan bolyp tabylady. Qala boıynsha jylý tutynýshy 3255 nysan bolsa, jalpy 16 myńǵa jýyq abonent bar.