Búgin birqatar óńirde úsik júrip, shańdy daýyl turady
ASTANA. KAZINFORM — Qazgıdromet sınopıkteri 17 qyrkúıek, seısenbige arnalǵan aýa raıy boljamyn jarııalady.
Aýqymdy antıtsıklonnyń yqpalymen Qazaqstannyń basym bóliginde jaýyn-shashynsyz aýa raıy saqtalady.
Eldiń soltústiginde, ońtústiginde, ońtústik-shyǵysynda fronttardyń áserinen naızaǵaı jarqyldap, jańbyr jaýady.
Respýblıka boıynsha jel kúsheıedi, ońtústikte shańdy daýyl soǵady.
Soltústikte, shyǵysta, ońtústik-shyǵystyń taýly aýdandarynda túngi jáne tańerteńgi ýaqytta tuman túsedi.
Abaı oblysynyń shyǵysynda, ortalyǵynda, Shyǵys Qazaqstan, Soltústik Qazaqstan, Pavlodar oblystarynyń soltústiginde, shyǵysynda, Qostanaı, Qaraǵandy oblystarynyń shyǵysynda, Aqmola oblysynyń soltústiginde, shyǵysynda, Jetisý oblysynyń taýly aýdandarynda 1-4 gradýs úsik júredi.
Barlyq derlik óńirde áli de tótenshe órt qaýpi saqtalyp tur.
